Mu sep kahchhuah vangin mi 3,000 in hliam tuar

Jammu and Kashmir-a tual≠chhung buaina thleng mekah mipui thinrimte thununna atana security force-ten mu sep, pellet an kahchhuah vanga hliam tuar chu mi 3,000 an tling tawh.

Kashmir Valley-ah hian ni 45 chhung tualchhung buaina a thleng tawh a, civil mi 5,800 zetin hliam an tuar a, an zinga mi 3,000 vel chu mu sep kahchhuah vanga hliam an ni.

Mipui thinrim chuan lung leh hmanraw dang hmangin security force-te an tawng ṭhin a, security force zingah hliam tuar mi 2,600 an awm tawh bawk. July 8-a Hizbul Mujahideen commander Burhan Wani thah a nih avanga tualchhung buaina a chhuah
aṭang khan Kashmir-ah hian nitin mi 175 velin hliam an tuar ziah anga chhut a ni.

Union Home Minister Rajnath Singh chuan Jammu and Kashmir dinhmun thlithlai tur leh, buaina chinfel dan ngaihtuah turin ni hnih chamin a tlawh a, nimin khan Chief Minister Mehbooba Mufti-i chu Sringar-ah a hmu. CM Mufti-i nena joint press conference an buatsaihah, Singh chuan Kashmir-ah all party team tirh a tiam a, sipaiten mu sep an hman ṭhin chu a thlakna tur dang ngaihtuah a tiam bawk. Hemi rual hian lung hmanga security force-te tawng ṭhin ṭhalaite chu counselling pek an ngai dawn tih a sawi.

Rajnath Singh chuan Kashmir mipuite chuan security force-te'n an tana an thawhsak tawhte theihnghilh lo tura a duh thu sawiin, an state-in tuilian rapthlak tak an tawrh ṭuma mipuite chhawmdawlna kawnga security force-te hnathawhte chu theihnghil lo turin a ngen. Prime Minister Narendra Modi pawhin Kashmir buaina chu a ngaihven hle a, thil awmdante pawh a sawipui fo niin a sawi bawk.

Singh chuan ramchhung hmun danga Kashmir miten harsatna an tawh ṭhinte pawh an hriatpu thu sawiin, an pual hian nodal officer dah a ni dawn tih a sawi. Hmun hrang hrangah Kashmir mi, harsatna tawkte chuan official hi telephone-in an be thei ang a, a ni hian an harsatna tawhte chinfel sak turin theihtawp a lo chhuah dawn a ni, a ti.

CM Mufti-i pawhin an state mipui 95% te chuan buaina chu tawp tawh se an duh a ni tiin, lunga intawng te chu Kashmir buaina chinfelna tur a ni lo, a ti.