Nirbhaya case-a convict jail chhungah intihlum a tum

Kum 2012-a Delhi khawpuia hmeichhe pakhat pawngsual rawn a nih thubuaia thiam loh chantir zinga pakhat, Tihar Jail-a tang mek Vinay Sharma chu nimin khan jail chhungah intihhlum a tum a, mahse an chhan hman.

Paramedic zirlai hmeichhe kum 23 mi chu kum 2012, December 16 zan khan south Delhi-a bus tlan laiah mi parukin sawisain an pawngsual rawn a, bus aṭang hian an paihchhuak zui a ni. He hmeichhia hian hliam na tak a tawrh avangin Singapore hospital-ah enkawl zui a ni a, mahse a hliam tuar loin a thi a ni. He pawikhawihna rapthlak tak thleng hian ram pum a nghawng a, hmun tam takah lungawi lohna lantir a ni a, sorkar pawhin hmeichhe laka pawikhawihna thlentute hremna dan pawh a siam danglam phah hial a ni.

Hmeichhe pawngsual rawntu mi parukte chu thiam loh chantir an ni a, an zinga pakhat chu kum tling lo anih avangin juvenile centre-ah dah a ni a, nikum December thla khan chhuah a ni. Mi pali-te chu thi tura hremna pek an ni.

Tihar jail-ah hian pawikhawihtu mi pali-te hi tantir an ni a, an zinga pakhat Ram Singh chu kum thum liamtaah khan jail chhungah hian an lo intihlum tawh a ni.

Vinay Sharma hi gym instructor a ni a, nikum khan a tanpui dangten kut an thlak ṭhin nia sawiin venhimna ṭha zawk pe turin alo ngen tawh a ni. Nimin khan damdawi a ei hnuah a towel-in inawhlum a tum a, mahse security guard-te'n hmuin an chhan hman a ni. Damdawi-inah hruai nghal a ni a, a dinhmun pawh a hlauhthawnawm tawh lo nia sawi a ni.