PM sum neih zat tarlang

Prime Minister Narendra Modi-a chu union cabinet member zinga a tam zawk aiin a rethei niin report tihchhuah tharah tarlan a ni.

Prime Minister office website-ah tarlan anih danin, PM Modi-a'n kum 2016, March thla khan pawisa fai a kawl zat chu Rs 89,700 a ni. Kum 2015-16 financial year chhung khan PM hian a lehkhabu ziah aṭanga sum a lakluh chu cheng nuai 12.35 a ni.

PM thil neih zat tarlanah hian, Gandhinagar-a a bank account-ah cheng nuai 2.10 a nei a, he bank-ah vek hian fixed deposit-in cheng nuai 50 chuang a dah bawk. Modi hian rangkachak zungbun pali, a vaiin cheng nuai 1.27 hu a nei. A lehkhabu aṭanga a sum hmuh bakah, a thil neih laksawn theihte belh khawm vek hnua PM thil neih hlut zawng hi cheng nuai 73.36 a ni.

Modi hian Gandhinagar-ah apartment pakhat a nei a, a hlut zawng hi cheng vaibelchhe khat anga chhut a ni. Hei bak hi in leh ram a nei lo.

PMO website-ah hian Finance Minister Arun Jaitley, External Affairs Minister Sushma Swaraj, Sadananda Gowda, Ramvilas Paswan, Maneka Gandhi, Prakash Javadekar and Urban Development Minister Venkaiah Naidu te thil neih zatte tarlan a ni bawk. Hetihlai hian sorkarin ngenna a siam hnuah minister tam zawk chuan an thil neihte hi mipui hmuh theih turin an la tarlang lo.