Rijiju-a'n Air India flight a tikhawtlai Amah a chuan theih nan passenger 3 chhuktir

Union Minister of state for Home Affairs Kiren Rijiju chuan June 24 khan Leh aṭanga Delhi pana Air India thlawhtheihna chhuak tur darkar khat dawn a tikhawtlai a, amah leh a ṭawiawmtute an chuan theih nan passenger pathum chhuktir an ni.

Air India spokesman chuan thilthleng chu an chhuichian mek thu a sawi. Hetihlai hian Rijiju chuan thlawhtheihna chu amah avanga khawtlai a nih loh thu a sawi.

"Thlawhtheihna hi dar 11:40-a thlawk chhuak tur a ni a, ka hre chiang chiah lo a, eng tin emaw thlawhtheihna thlawh chhuah hun chu sawn hma a ni a, ka tihkhawtlai a ni lo. Inbiakna chiang lo leh thuchiang hriat loh vang a ni," tiin a sawi.

Jammu & Kashmir-a "Sindhu Darshan" festival a chhim hnuah June 24 khan Delhi-a let tur a ni tih Rijiju chuan Press Trust of India (PTI) a hrilh a, a rualin Jammu and Kashmir Deputy Chief Minister Nirmal Singh pawh a tel thu leh thlawhtheihna chhuah hun chu sawn hlat a nih thu a sawi.

"Leh aṭangin helicopter-a let tur ka ni a, mahse khua a ṭhat loh avangin Sri Nagar aṭangin helicopter a rawn thlawk chhuak thei lo a, hei vang hian J&K Deputy CM Singh chuan Air India flight-ah a ruala kal turin min sawm a ni. Thlawhtheihna hi dar 11:40-a chhuak tur a ni a, mahse dar 10 leh minit 20-a Leh Airport kan thlen chuan thlawhtheihna kawngkhar chu khar a ni tawh a, thlawh chhuah a tum tawh a ni. Hriattirna puang loa thlawhtheihna chhuah hun sawn hma a nih vang chuan J&K Deputy Chief Minister chuan a lungawi loh thu Civil Aviation Minister-a thlen nghal bawk a ni," tiin Rijiju chuan a sawi.

A hnuah J&K Deputy Chief Minister leh amah chu thlawhtheihna chuan phalsak an ni, a ti. Amah avanga mi pathum chhuktir an nih chungchang zawhna chu Rijiju chuan a hriat loh thu a sawi. "Keimahni avanga passenger dang chhuktir chu ka hre lo a, an lo ti a nih chuan thil dik lo leh pawm theih loh a ni," a ti.

Prime Minister Office chuan VIP te vanga Air India flight tihkhawtlai nia sawi chungchangah report kimchang pe turin Civil Aviation ministry a hriattir. Rijiju hma hian Maharashtra Chief Minister, BJP hruaitu Devendra Fadnavis chu June 29 khan Mumbai aṭanga Newark pan tur Air India flight darkar khat dawn tikhawtlaiah puh a lo ni tawh bawk. Ministry chuan report an dawn hunah a ṭul anga hma an lak tur thu a sawi.