UK-in India Maggi a himah a ngai

United Kingdom-a ei tur enfiahtu, Food Standards Agency (FSA) chuan Nestle India siam, Maggi noodles-a lead awm zat chu European Union phal chin a ni tiin, mihring eiah him tawka a ngaih thu a sawi.

FSA thuchhuah chuan, "UK-a Maggi noodles sample hrang hrang a test te chu FSA chuan a him tawkah a ngai a, a lei duh tan buaina tur a awm lo," a ti.

India rama Maggi test ṭhen­khatah danin a phal bak aia tam lead hmuh a nih hnuah, FSA hian UK-a Maggi noodles te chu test turin a ti ve tih a sawi bawk. Sample hrang hrang an lakkhawm a, an test hi 900 vel zet a ni. Hetihlai hian Nestle India chuan Maggi Noodles zingah UK-ah hian 'masala flavour' chauh thawn luh a ni tih a sawi.

FSA bakah Vietnam Food Admi­nistration (VFA), National Mea­sure­ment Institute, Australia leh Singa­pore-a Agri-Food and Veterinary Authority (AVA) chuan India aṭanga Maagi noodles an lakluh chu an test hnuah, ei atan him tawka an ngaih thu an tarlang tawh bawk.

Nestle India hian Canada, UK, Singapore leh Kenya bakah, US, Australia leh New Zealand-ah te Maggi noodles hi a thawnchhuak.