RS-ah sawisel hlawh Farmer bill pass ve leh

Sawisel hlawh tak farmer bill chu Lok Sabha-ah pass a nih hnuin nimin khan Rajya Sabha (upper house)-ah eptuten nasa taka an sawiselna karah pass a ni ve leh ta.

Vote laka hmaa sawiho­na neihah, Congress MP Partap Singh Bajwa chuan farmer bill pathum hi Congress party chuan a pawmpui dawn loh thu a sawi a, a bikin he bill hi Punjab leh Haryana-a loneitute tana ṭha lo a ni, a ti. "Loneitute hi mimawl an ni bik lo a, sorkarin MSP (Minimum Support Price) nuai bo a tum hi an hai bik lo a ni, tiin a sawi. 

"India-a mi hausa tawntaw, Ambani, Adani leh corporation lian tak tak te chu loneitute thar chhuah zawrhna market-ah an rawn lut thei tawh dawn a, loneitute chu an awpbet tawh mai dawn a ni. India agriculture sector chu big corporate house-te thuhnuaiah a awm tawh ang. Hei hi East India Company leh Portuguese-ten India sumdawnna an rawn lehthal ang chiah kha a ni dawn," tiin Bajwa chuan house inkhawmah uar takin a sawi. Bill hian India federal cooperation spirit a kalh a ni, a ti. 

Union minister of agricul­ture and farmer welfare Narendra Singh Tomar chuan nimin khan Lok Sabha-a pass tawh bill pathum, The Farmers Produce Trade and Commerce (Promotion and Facilitation) Ordinance, 2020, The Farmers (Empowerment and Protection) Agreement leh The Essential Commodities (Amendment) Ordinance, 2020 chu Rajya Sabha-ah a pu lut a,a hmasa pahnih hi voice vote hmanga pass-in,  The Essential Commodities (Amendment) Ordinance, 2020 erawh chu inkhawm tihtawp a nih avangin an pass hman ta lo a ni. 

Bill hi eptu lam chuan an do na hle a, Congress bakah hian Aam Aadmi Party (AAP), Trinamool Congress leh party dangte pawhin an duh lo hle a ni. Loneitute thawhchhuah hi India gross domestic product (GDP)-a 20% a ni pha.

Rajya Sabha inkhawm tihtawp a nih hnuah pawh Congress leh eptu party dang member-te chuan farmer bill pass tak duh lohna lantirin Rajya Sabha chamber an chhuahsan duh lo. 

Congress, Trinamool Congress, DMK, Left party leh party dang member-te chuan dar 1-ah rorel inkhawm a tawp  hnuah an awmna hmun hi chawhnu dar 3 thleng khan an chhuahsan duh lo a ni. 

Hripui leng vangin House rorel inkhawm neih dan pawh siamrem niin, nimin dar 1 thleng khan Rajya Sabha in inkhawm neiin, chawhnu dar 3 aṭangin Lok Sabha rorel neih ve thung a ni. Member-te inhlata an awm theihna turin rorel inkhawm ṭum khatah hian Lok Sabha leh Rajya Sabha chamber-te chu hman rual zel an ni.