India ramah Covid19 kai nuai 54 chuang awm tawh

Sorkarin nimina report a tihchhuah thlengin India ramah Covid-19 kai mi nuai 54 chuang an awm tawh a, enkawl dam nuai 43 chuang an awm tawh bawk.

Maharashtra chu hri kai tam lamah an sang fal tawh hle a, nuai 11.8 chuang hri kai an awm tawh a, Andhra Pradesh leh Tamil Nadu chu Maharashtra tih loah chuan hri kai tamna state an ni.

Ministry of Health and Family Welfare-in nimina report a tihchhuahah chuan Inrinni khan hri kai hmuh chhuah thar mi 92,605 an awm leh a, ramchhung hmun hrang hrangah hri kai 54,00,619 an awm tawh.

Enkawl dam pawh an pung chak hle a, nimin report-ah khan enkawl dam 94,612 lai an awm a, hei nen hian mi 43,03,043 chu enkal dam an ni tawh. Mi 1,133 laiin an thihpui leh bawk a, coronavirus vangin India ramah mi 86,752 an thi tawh. 

MoHFW Report:

Hri kai tawh    :  54,00,619

Hri kai mek    :  10,10,824

Enkawm dam tawh    :  43,03,043

Thihpui    :  86,752

India ram hi hri kai tam lamah khawvelah pahnihna an la nih chhunzawm zel a, hri kai tamna ber ram USA aiin hri kai nuai 15.5 velin an la tlem zawk. Hetihlai hian India ram chu hri kai enkawl dam tamna ber ram a ni a, nuai 43 chuang enkawl dam an nih tawh laiin US-ah chuan nuai 41 bawr vel an enkawl dam tawh thung.

Enkawl dam tawh rate pawh a sang tawh hle a, 79.68% niin, hri kai mek rate chu 18.72% a ni a; thihpui rate chu 1.61% a ni bawk.

Indian Council of Medical Research (ICMR) chuan nimina report an tihchhuahah Inrinni khan sample 12,06,806 an endik tih an tarlang a, hei hi ni khata test an ngah ber ni a ni tih sorkar report chuan a tarlang. Hri len ṭantirh aṭanga nimina report an tihchhuah thleng hian sample 6,36,61,060 an endik tawh.

Sample endikna tura laboratory pawmpui 1,773 lai an nei tawh bawk a, chung zinga 1,061 chu sorkar laboratory niin 712 chu private laboratory a ni thung.