MP zinga Covid-19 kai an pun zel vangin Parliament session tihtawi tum

Parliament monsoon session neih mek chu ramchhunga Covid-19 hri kai thar an pun belh avang leh,  member of parliament (MP) zinga pawh hri kai an pun zel avangin tun kar chho hian tihtawi tuma hmalakna neih mek a ni.

Kar liam ta Inrinni khan Lok Sabha business advisory committee (all party) chuan meeting an nei a, he hun hi speaker chuan kaihruaiin, meeting-ah hian September 24 hmaa session neih mek hi titawp tuma rel a ni. Meeting-a thu rel hi thu tawp a la ni lo a, Lok Sabha Speaker Om Birla chuan thutlukna a siam ang.

September 14 khan session  hi neih ṭan a ni a, session neih hmaa parliament member-te Covid-19 test neih sak an nih hnuah an zinga  25, Lok Sabha member 17 leh Rajya Sabha member pariatten coronavirus hi an kai a ni. A hnuah MP zingah hri kai hmuh belh an awm leh a, Parliament staff zingah leh MP zinga hri kai hmuhchhuah tawh hi mi 30 chuang an awm tawh.

Lok Sabha-ah hian agriculture sector kaihhnawih ordinance thlakna tur bill pathum, The Farmers Produce Trade and Commerce (Promotion and Facilitation) Ordinance, 2020, The Farmers (Empowerment and Protection) Agreement leh The Essential Commodities (Amendment) Ordinance, 2020 chu pass a ni tawh a, hei bakah hian MP-te hlawh pawh 30% chu Covid-19 dona atan hman tura pass a ni tawh bawk.