J&K-a mu sep hman ṭhin thlakna tur siam dawn

Jammu and Kashmir tualchhung buaina thleng mekah security force-te'n mipui thinrim pungkhawmte hnawhdarhna atana musep (pellet) an kahchhuah ṭhin chuan sawisel a hlawh avangin a thlakna tur ngaihtuah a ni.

Union Home Ministry-in hemi chung≠chang ngaihtuah tura expert committee a din chuan pellet thlakna tur hian silai mu hlo aia hmarcha hmanna, chilli based PAVA shell hmang turin rawtna a siam. Mahse thutlukna erawh siam a la ni lo.

PAVA shell hi pellet aiin mihring tan a hlauhawm lo zawk dawn a, meter 4-5 aṭanga hlaa kahchhuah chi niin, mipui pungkhawmte chu hun eng emaw chen a thunun theih rin a ni.

Home ministry-in expert committee a dinah hian member pasarih an awm a, Home Ministry, Border Security Force (BSF), Central Reserve Police Force (CRPF), Jammu and Kashmir Police, IIT-Delhi leh Ordnance Factory Board aiawhte an tel. Pellet thlakna atana an rawt, PAVA shell hi New Delhi-a Central Industrial Security Force (CISF) test field-ah an enchhin.

PAVA shell hi CIST test field-a enchhin a nih hnu hian panel chuan Kashmir Valley-a mipui pungkhawmte thunun nana security force-te hman tir turin a ṭha tawk niin a ngai.

Kashmir Valley-a mipui leh security force inkara buaina thlengah, mipui pungkhawmte thunun leh hnawh darhna atan security force-te chuan mu sep an hmang ṭhin a, mahse pellet kahchhuah hian mi tam tak a hliam bakah, an mita kahfuh an nih vanga mitdel phah tur eng emaw zat an awm avangin sawi≠sel a hlawh hle. J&K-a eptu party aiawhte pawhin Prime Minister Narendra Modi an hmuh ṭumin pellet hman hi khap turin an ngen tawh a ni.

Union Home Minister Rajnath Singh pawhin Jammu and Kashmir dinhmun enfiah tur hian a kal a, Ningani khan Srinagar-a chanchin thar lakhawmtute a kawmnaah, pellet thlakna tur hi ngaihtuah mek a nih thu sawiin, ni reilote hnuah tihfel a nih tur thu a sawi. Hei bakah hian sorkar laipuiin J&K-a thil thleng mek enfiah tur leh, an buaina chinfel dan kawng zawnpui turin all-party team tirh a tum thu a sawi bawk.

Tualchhung buaina thleng vang hian Kashmir Valley-ah hian ni 49 chhung mipui punkhawm khapna dan hman a ni tawh. Boruakin ziaawm lam a pan avangin hmun tam zawkah curfew thlah dul a ni tawh bawk. Mahse nimin khan Kashmir chhim lamah inlakhran duhtu pawlten nawrh huaihawt an tum leh avangin Pulwama, Shopian leh Anantnag khuaah curfew puan leh a ni.

Senior police official chuan nimin khan Srinagar leh Pulwama district bakah south Kashmir-a Shopian leh Anantnag khuaah curfew hi puan leh a nih thu a sawi a, hei baka hian Kashmir hmar lama Pattan, Baramullah leh Handwara khuaah pawh curfew puan a ni bawk.