Rel 10,000 chuangah advertisement dah dawn

Ministry of Railways chuan sum lakluhna kawng khat atan rel 10,000 chuangah advertisement dah a tum a, Rajdhami Express pawh telh a ni ang. Rel-a advertisement dah aṭang hian cheng vaibelchhe 11,000 vel lakluh belh theih an inbeisei.

Thla reilo hnuah Rajdhani Express te pawhin an trademark, rawng sen an pu tawh dawn lo a, rel hrang hrangte advertisement hmanga chei an ni tawh zawk ang. A hmasa ber atan rel 20 chuang chu vinyl hmangin tuam an ni ang a, advertisement ti duh tan tender tihchhuah a ni ang. Advertisment tih man hi cheng vaibelchhe 1.2 - 6 inkar vel a ni ang.

Railways hian rel 13,000 chuang chu nitin km 63,000 chuangah a tlantir a, khualzin maktaduai 23 vel an phur ṭhin. Mahse sum lamah a indaih lo hle a, hei vang hian sum lakluhna kawng dang a ngaihtuah a ni.

Official-te chuan Indian Railway hian advertisement aṭanga sum a lakluh zinga 5% chauh a hmang niin an sawi a, hetihlai hian khawvel hmun danga railway network-te chuan 20% an hmang niin an sawi.

Hetihlai hian Railways Ministry leh Ministry of Tourism chuan khualzin tam zawk hip tumin ram chhunga Adarsh rel station 50 chu chei ṭhat an tum. Ministry pahnih hian infrastructure thuam
ṭhatna tur hian thawhdunna tur inremna thuthlung an ziak a ni. Heng station-te hi thenfai niin, tual≠chhung mite nun≠phung tilang thei zawnga chei an ni ang.

Union tourism minister Mahesh Sharma chuan station an cheiṭhat turah hian direction board, tourist guide leh thil dang pawimawhte an dah lang vek dawn tih sawiin, hei hian khualzinte tan thil a tihawlsam sak dawn bakah, midang tam zawk an hip luh theih an beisei thu a sawi.