Kashmir-ah khuahkhirhna dan hmang chhunzawm zel

Tualchhung buaina thleng vangin nimin thleng khan Kashmir Valley-ah a ni 51-na atan khuahkhirhna dan hman chhunzawm a la ni.

Police-te chuan curfew puan chu Anantnag khuaah chauh hman chhunzawm a ni tawh a, hmun dangah chuan hlih a ni tawh tih an sawi. Mahse Valley chhunga hmun tam zawkah chuan CrPC section 144 hman chhunzawm a la ni a, Srinagar khawpuiah pawh he dan hi hman a ni.

July 9 aṭanga Kashmir Valley tualchhung buaina thleng vanga thi hi mi 71 an tling tawh a, an zinga mi 68 chu civil mi niin, police pathum an thi tel bawk. Mi sing chuangin hliam an tuar bawk.

Hun rei tak chhung tual≠chhung buaina chhuakin nunphung a tihkhaihlak avangin sumdawngte pawhin an tuar nasa hle a, buaina chhuah hnuah sumdawnna lama sum hloh zat hi cheng vaibelchhe 7,500 chuang a tling tawh.

Prime Minister Narendra Modi chuan nimin khan thla tina radio programme a hman
ṭhin, Mann ki Baat programme a hmannaa thu a sawiah, Jammu and Kashmir buaina chungchang a sawichhuak. PM Modi chuan Kashmir Valley-a buaina chhuak vanga thi te chu, civil mi emaw, security force emaw pawh ni se, India tana channa nasa tak a ni, a ti. Kashmir buaina chinfel duhin political party zawng zawng pawh an inlungrual a ni, a ti.

Jammu and Kashmir Chief Minister Mehbooba Mufti-i chuan an state-a buaina chhuak ti punluntuah Pakistan a puh. CM chuan Pakistan chu langsar takin Kashmir Valley-a buaina thleng mekah a inrawlh a ni, a ti. Kashmir Valley mipuiten harsatna an tawh mek chu a lainat takzet a nih chuan, Pakistan chu buaina tipunlun turin a inrawlh lo ang, tiin a sawi.