Bihar leh UP-ah tuilian tuar 53,000 chhanchhuak

National Disater Response Force (NDRF) team chuan Bihar leh Uttar Pra≠desh-ah tuilian tuar mi 53,000 an chhanchhuak tawh.

NDRF hian tuilian tuarte chhanchhuah leh chhawm≠dawl hna thawk tur hian team 75 a tirchhuak a, heng team hrang hrang≠te hian Bihar leh UP-a De≠puty Inspector Ge≠ne≠ral-rank officer-te enpui≠na hnuai≠ah tuilian tuarte chhanchhuah hna hi an thawk a ni.

Tuilian tuar mi 53,000 te an chhanchhuah tawh bakah, NDRF team hian damdawi lama enkawl ngai mi 12,200 an ṭanpui tawh bawk a, harsatna tawk mek≠te puih hna hi an la thawk chhunzawm reng a ni.

NDRF team hi Bihar-a Munger, Samastipur, Begusarai, Fathuha, Patna, Bhagalpur, Didarganj, Danapur, Bakhtiyarpur, Buxar, Vaishali leh Chhapra-ah tirh an ni a, tuilian tuarte hi hmun him lamah an hruai≠chhuak a ni. Uttar Pradesh-ah pawh Allahabad, Banda, Gazipur, Varanasi leh Ballia district-ahte tirh an ni bawk.

Bihar state-ah hian tuilian vangin mi 153 in nunna an chan tawh a, Ganga, Sone, Punpun, Burhi Gandak, Ghaghra, Kosi leh lui dang lian hian khaw 2,037-a mi nuai 34.69 te a nghawng a ni. Lui ṭhenkhat chuan kam lam pan mah se, a tam zawk erawh chuan hlauhawm chhinchhiahna an la pel a ni.