PoK aṭanga tlanchhiate tan vbch 2,000 ruahman

Sorkar laipui chuan Pakistan occupied Kashmir (PoK) aṭanga India rama rawn tlanchhiate chhawmdawlna turin cheng vaibelchhe 2,000 ruahman sak turin rawtna a siam.

Home Ministry chuan rawtna siam hi Cabinet pawmpui turin a thehlut thuai dawn niin official chuan a sawi.

Jammu and Kashmir sorkar chuan PoK aṭanga India rama rawn tlanlut hi chhungkaw 36,348 an awm niin a sawi a, heng mite hnenah chhungkaw tin cheng nuai 5.5 ṭheuh pek tum an ni. PoK aṭanga rawn raltlante hi a tam zawk chu Jammu, Kathua leh Rajouri district-ah an cheng a ni.

J&K-a raltlan rawn luh ṭhenkhatte hi kum 1947-a India leh Pakistan ṭhenhran a nih dawn rawn lut a ni a, a dange hi 1965 leh 1971-a Pakistan nena indo
ṭuma rawn tlanchhiate an ni. Heng mite hian Lok Sabha inthlanpuiah vote thlak mah se, Jammu and Kashmir assembly inthlanah erawh vote an thlak thei lo.

PoK aṭanga rawn tlanchhiate aiawha hma la tu, Jammu and Kashmir Sharanarthi Action Committee (JKSAC) chuan sorkar laipuiin cheng vaibelchhe 2,000 a ruahman hi a tawk lo tih sawiin, an vaia an inbenbelna tur atan chuan cheng vaibelchhe 9,200 a ngai tih a sawi.

Kum 2015 January thla khan NDA sorkar chuan Pakistan aṭanga rawn raltlante harsatna hrang hrang neihte a ngaihtuah hnuah ngaihnathiamna
ṭhenkhat a lo siamsak tawh a ni. Heng zingah hian pararmilitary force-a an luh theihna tur siamsak te, state chhungah hna zawna kawnga enhran bik an nih loh na tur leh, Kendriya Vidyalaya-a an fate an luh theihna turte a lo siamsak tawh a ni.