GST vangin Parliament session sawn hma tum

30th August, 2016

Goods and Services Tax (GST) pass tak chu nakkum April 1 aṭanga hman ṭan tura tih a ni a, hun tiam chhunga a
ṭul ang te tihfel hman a nih theih nan sorkar laipui chuan Parliament thlasik ṭhutkhawm hun chu sawn hma a tum nia sawi a ni.

Cabinet Committee on Parliament affairs chuan session ṭan hun tur hi a tifel dawn a ni. Dan pang≠ngai chuan Parliament Winter Session hi November thla chawlhkar thumnaah neih ṭhin a ni a, mahse GST vang hian kuminah chuan ni 15 velin sawn hma a nih rin a ni.

GST bill hi Parliament fur ṭhutkhawmah hian pass a ni tawh a, mahse a taka kalpui tur chuan state hrang hrang zinga 50% ten an pawm ve leh phawt a ngai dawn a ni. He bill hi state pariat - Assam, Bihar, Chhattisgarh, Jharkhand, Himachal Pradesh, Gujarat, Delhi leh Ma≠dhya Pradesh-te chuan an pawm tawh. Bill pawm tawh zinga pathum, Himachal Pradesh, Bihar leh Delhi-te chu NDA sorkar lohna state an ni.

Bill hi August thlaah Rajya Sabha leh Lok Sabha-ah lung≠rual taka pass a ni tawh a, BJP President Amit Shah leh Prime Minister Narendra Modi-te chuan BJP leh NDA sorkarna state-te hnenah bill hi a rang thei anga pass tura session nei turin an lo nawr tawh a ni.

Sorkar chuan GST hman a nih theihna tura thil pawimawh, Central Goods and Services Tax (CGST) leh Integrated Goods and Services Tax (IGST) bill pawh a pass a ngai dawn a, hengte hi November thla chhung emaw, a tlai berah December thlaah emaw chuan pawm fel vek a ngai dawn niin sorkar official-te chuan an sawi.

GST bill hi September thlaah chuan state assembly zinga 50% ten an ngaihtuah hman beisei a ni a, assembly 16-in an pawm hunah President hriattirin, rate chungchang siamtu tur GST council din turin hma lak ṭan a ni ang. Rate-te hi tihfel a nih hunah, upper limit chu bill-ah hian telh a ni ang a, hei hi sorkar laipuiah thlen a ni ang.

GST bill hi a taka hman a nih hunah chuan state-in a hrana chhiah a lak ṭhinte titawpin, centre leh state level-ah single tax chauh lak a ni tawh dawn a ni. Hei hi consumer-te tan a ṭhat dawn bakah, sorkar pawhin sum lakluhna kawngah a chhawr dawn a, economy ṭhanna thlengin a pui thei dawn a ni.