EAM leh Greece FM Gerapetritis inkawm

External Affairs Minister (EAM) S.Jaishankar leh Greece foreign minister George Gerapatritis te chu Ningani, February 6, khan Hyderabad House, Delh-ah an inkawm. Ram pahnih hruaitute hian thawh dunna tur leh hmasawnna tur hrang hrangte an sawi dun.

Greece Foreign Affairs Minister hian February 5 khan India lo thlengin, vawiin thleng hian a cham dawn niin Ministry of External Affairs(MEA) chuan a tarlang.

Ram pahnih hruaitute hian thawh dunna tur hrang hrang - sumdawnna, shipping, artificial intelligence, leh nundan phung tih hmasawn tawnna kawngah te inbiakna hi an nei. Hei bakah hian India - Mediterranean connect bakah India - Middle East-Europe Economic Corridor (IMEC) tih hmasawnna tur leh hmalak dan tur te an sawi dun bawk.

Jaishankar hian an inkawm chungchang hi X ah post-in," IMEC leh Indian - mediterrannean connect chungchang kan sawi a, ram pahnih thawhdunna tharah hetiang lam hawia hmasawnna neih chu inbiakna hian a tum ber a ni. India chuan Greece chu UNSC member 2025-26 a nih chhung chuan theihtawpa thlawp tlat a tum bawk" tiin Greece nen thawh dun an tum dan hi a tarlang.

Thawh dunna tur an sawiah hian India - Middle East - Europe Economic Corridor (IMEC) tih hmasawnna turin Saudia Arabia, India, US leh Europe te inkar rel kawng leh lawng hmanga in kalpawhna tih changtlun tum a ni. Hei bakah Asia, Middle East leh West te hmasawnna ngaih pawimawh tel chu an thil tum zingah a tel bawk.