PM Modi-a'n France a tlawh dawn

Prime minister Narendra Modi chuan ni thum cham turin February 10 hian France a pan dawn a, Paris-a Artificial Intelligence(AI) Action Summit neih tur chu France president Emmanuel Macron nen an kaihruai dawn a ni. President Macron nen hian ram pahnih thawhdun dan sawiin inkawmna an nei nghal ang.

Prime Minister Modi hian February 10-ah France thlengin, hemi ni hian VIP summit zanriah a chhim nghal ang. February 11-ah AI Action summit an nei ang. Summit hman ni vek hian chawhnu lamah CEO rountable buatsaih Modi leh Macron hian an kaihruai nghal dawn bawk. February 12-ah France aṭangin US a pan dawn a ni.

Modi hian Marseille-ah India consulate a hawng dawn a, hemi hnu hian President Macron nen an inkawm dawn a ni. France rama PM Modi a cham chhung hian defence, Small Modular Reactors(SMR) leh aircraft Maintenance, Repair and Overhaul(MRO) lama ram pahnihten thawh dunna tur thu pawimawh tak puan beisei a ni bawk.

France chuan India nena thawh dunna ṭha zawk an neih theihna turin 2030 hma ngeia India mi zirlai 30,000 neih tlin hman a tum a, tunah hian zirlai 10,000 vel an awm mek a ni.