Kashmir-ah nawrh huaihawt chhunzawm

Jammu and Kashmir sorkarin Kashmir Valley-a curfew a puan chu thlahdul tawh mah se, inlakhran duhtu pawlte chuan nimin khan nawrh an la huaihawt chhunzawm.

Police official-te chuan Kashmir Valley-a tualchhung buaina thleng avanga ni 50 chuang zet curfew puan anih hnuah, Srinagar-a Nowhatta leh MR Gunj police station area tih lohah chuan curfew hi hlih vek a nih tawh tih an sawi.

Kashmir buaina chinfel dan ngaihtuah turin September 4 hian Union Home Minister Rajnath Singh kaihhruai all party team chu an kal dawn a, tualchhunga pawl hrang hrang hruaitute an kawm ang. Mahse official-te chuan all party team hian pawn chhuak thei loa hren mek, inlakhhran duhtu pawl hruaitute chu an hmu dawn lo niin an tarlang.

Boruakin ziaawm lam a pan mek laiin, inlakhran duhtute chuan September 1 thleng nawrh chhunzawm an tum thu sawiin, mipuite chu nunphung pang≠ngai la zawm lo turin an hrilh.

Curfew hi hlih ni tawh mah se, nimin thleng khan dawr lian inhawng a la awm lo a, public transport lam pawh an la tlanchhuak lo. Zirna in hrang hrangte pawh ni 53 chhung khar an ni tawh bawk.

Defence Minister Manohar Parrikar chuan Kashmir Valley-a buaina tipunluntu chu ram pawn lam mi tlemte an ni tiin, tharum thawhna thlengte tihtawp tur hian sorkar chuan theihtawp a chhuah a ni, a ti.

Kashmir-a buaina chhuak thununna atana sipaiten mu sep (pellet) an hman ṭhin chuan mi tam tak a hliam nat avangin a thlakna tur ngaihtuah mek a ni a, a thlakna tura rawtna te pawh thehluh a ni tawh. Mu sep kahchhuah vang hian mi tam takin an lu lamah hliam an tuar a, eng emaw zat chu an mit a del phah dawn a ni. Hei vang hian pawl hrang hrang chuan sorkar laipuiah sipaiten mu sep an hmang ṭhin chu khapsak turin an lo ngen tawh bawk. Home Minister Rajnath Singh-an hemi chungchang ngaihtuah tura panel a din chuan pellet gun aiah hian PAVA shell hman an lo rawt tawh a ni.

Hetih lai hian sorkar laipui chuan kum 2012 daih tawhah khan Kashmir-a police leh sipaiten mu sep an hman ṭhin thlakna tur, a aia hlauhawm loh deuh zawk hmanrua hmanna tur hi a lo pawm daih tawh nia sawi a ni. Kum 2010-a nawrh huaihawt ṭuma police-te'n mi 110 zet an kakhlum hnu khan, khatih laia Prime Minister Manmohan Singh chuan hmanrua hlauhawm lo leh thihna thlen tam lo tur zawk hi a lo ngaihtuah tawh a ni. Pellet gun thlakna atan hian rubber ball te pawh test a lo ni tawh niin report chuan a tarlang. Mahse Ministry of Home Affairs chuan hmanraw thlakna tura tih hi test nawn leh phawt turin a ti leh a ni.