Bihar CM-in central team tir turin ngen

Bihar Chief Minister Nitish Kumar chuan an state-a tuilianin thil a tihchhiat dan hrang hrangte a hmuna enfiah tura central team tir turin sorkar laipui a ngen.

Nitish Kumar chuan, "Tunhnaia district 12-a tuilianin thil a tihchhiat hlut zawng hi cheng vaibelchhe 350 hu vel a tling a ni. Thil a tihchhiatte siam ṭha tur leh, tuilian tuarte chhawm≠dawlna tur hian sum tam tham tak mamawh a ni. Hei vang hian sorkar laipui hnenah thil thlen dan te enfiah a, detailed report siam tura central team rawn tir turin ka ngen a ni. Keini pawhin sorkar laipuiah hian memorandum kan la thawn dawn bawk a ni" a ti.

Tuilian tuarte awmna tur hian district hrang hrangah relief camp siam a ni a, harsatna tawk mekte chhawmdawl hna chu state sorkar chuan a ngaihpawimawh ber a nih thu CM chuan a sawi.

CM hian Pathianni leh Thawhṭanni khan thlawhtheihna hmangin Bhagalpur, Munger, Katihar leh Khagaria district-a tuilenna hmunte a en a, hemi hnu hian official-te meeting a neihpui nghal bawk. Heng district-a relief camp hrang hrangte a tlawh a, district thuneitute hnenah camp-a chengte chaw ṭha pe tur leh, naupangte tana bawnghnute sem turin a hrilh a ni.

Bihar district 12-a tuilian hian mi nuai 30 chuang zet a nghawng a, tuilian vang hian mi 50 chuangin nunna an chan tawh bawk.