Nitish Kumar-a'n a thutlukna sawiseltu An party chhuahsan phalsak

Bihar chief minister leh JD(U) president Nitish Kumar chuan Citizenship (Amendment) Act an thlawp avanga an party sawiseltu leh, Delhi Asesmbly inthlan neihtura BJP thawhpui a rem­tih avanga a mimal taka sawi­seltu, an party hruaitu Pavan Varma chu a duh chuan JD(U) chhuahsan mai turin a ti.

Nimina media mite nena an inkawmnaah, Kumar chuan Varma chuan a lungawi lohna a lanchhuah tir dan chu a dik lo a ni tiin, mimal inbiaknate chu vantlang hriatah a puangzar tur a ni lo, a ti. Bihar CM chuan Varma chu zah hle mah se, a duh chuan JD(U) chhuahsan a, party dang zawm turin a zalen reng a ni, tiin a sawi. Nilaini khan Varma chuan Nitish Kumar hi open letter thawnin, Delhi Assembly inthlan neih tura JDU in BJP a thawhpui tum chungchangah, Kumar thutlukna siam chuan a tihnualin, a tihrilhhai hle tih a sawi a ni. 

Varma chuan BJP in ram ṭhendarhna tura CAA-NPR-NRC scheme kalpui a tum avanga ram puma lungawi lohna a awm laia JD(U) in BJP thawhpui a lo tum chhan chu zawtin, Nitish Kumar ngei pawh hian ṭum eng emaw zat BJP-RSS laka a lungawi loh thute pawh a lo sawi fo tawh a ni, a ti. 

"Kum 2017 ah in kawng thlak a, sorkar siam tura BJP i thawhpui hnu pawh khan BJP chungchanga i mimal ngaihdan chu a la danglam chuang lo. Kan pahniha kan inbiaknaah pawh BJP hruaituten an hmusit zia che pawh min hrilh a nih kha. Vawi khat aia tam, BJP in India chu dinhmun hlauhawm takah a hruai a ni tiin i sawi a ni," tiin Varma chuan a sawi. Hetichunga JD(U) in Bihar pawn lama BJP a thawhpui ta mai chu a hriatthiam loh thu sawiin, JD(U) chuan an party constitution an chawinun leh a ngai a ni, tiin a sawi. 

Delhi Assembly inthlan neih turah JD(U) hian BJP thawh­puiin, seat 70 awmah seat hnih­ a chuh ve dawn a ni.