Amit Shah Bengal rally-ah MLA 10-in BJP an zawm

BJP zawm thar MLA zinga pasarih hi  Trinamool Congress (TMC) legislator an ni a, chung zingah chuan an hruaitu langsar tak Suvendu Adhikari pawh a tel. Midang pathum hi chu Left party leh Congress MLA an ni thung.

West Bengal hian thla nga hnuah inthlan an hmachhawn dawn a, chief minister Mamata Banerjee tan chuan an MLA pasarih ngawtin BJP an zawm hi a luhai thlak hle tura ngaih a ni. Amit Shah chuan, "Didi, uluk takin lo ngaithla teh. Inthlan result puan a nih hnuah BJP chuan seat 200 chuang an la dawn tih puang turin vawiinah hian ka lokal a ni," tiin a sawi. Rally neih zawh hnuah hian Shah hian Kolkata-ah state party hruaitute chu closed-door meeting neihpuiin inthlan kalpui dan tur chungchang a sawipui. He meeting-ah hian state dang BJP hruaitute pawh an tel.

MLA 10 BJP zawm thar zingah hian Adhikari chiah hi assembly-a banna thehlut a la awm a, mahse technical ground-ah pawm a la ni lo thung. Union Home Minister hnen aṭanga BJP flag a lak dawna a ke a khawih sak chu media hrang hrangin an tarlang uar hle. Adhikari khua, East Midnapore-ah chuan poster lianpui Adhikari Mir Zafar (Bengal indepenent nawab hnuhnung ber Siraj-ud-Daula, Battle of Plassey kum 1757-a phatsantu Mir Zafar hming leh a hming kaihkawp) tih inziak hmuh tur a awm nghe nghe. A ṭhuihhruaite office ṭhenkhat chu beih a ni bawk a, hemi a nih avang hian Adhikari hi central paramilitary force-in an ven phah hial.

Hetih lai hian TMC Lok Sabha member Saugata Roy chuan an party chhuahsan MLA-te  zingah hruaitu pawimawh tak an awm lo tih a sawi thung a, an tel loin TMC chuan buaina nei miah loin inthlanah hnehna an chang dawn tho tih a sawi. MLA 10-te bakah hian TMC Burdwan East Lok Sabha MP Sunil Mandal, minister hlui Shyama Prasad Mukherjee, LS member hlui Dasrath Tirkey leh TMC civic body councillor 15-te pawhin BJP hi an zawm a, anni bakah hian party dang eng emaw zat aṭanga zawm thar an awm bawk.

"Didi nang pawhin i dinhmun i thlak tawh. Congress chhuahsanin TMC i din a ni lawm ni? Tunah Suvendu Bhai chu a awmna a thlak avangin i sawisel leh si. BJP zawm duh mi sang chuang an awm. Lo nghak reng mah rawh," tiin Shah chuan Mamata Banerjee chu a bei zui a ni.