Vawiinah Income Tax Bill thar pharh dawn

Parliament Budget session neih mekah vawiin hian Income Tax bill thar chu Lok Sabha-ah finance minister Nirmala Sitharaman-in a pharh dawn. Income Tax bill thar hi pawm a nih chuan kum 60 chuang lo hman tawh Income Tax Act 1961, a thlak ang.

Finance Minister Sitharaman hian 2025-26 budget a pharh ṭum khan income tax bill thar hi pharh a nih tur thu a sawi a ni. Nikum July thla pawh khan Income Tax Act 1961, ennawn a nih tur a lo sawi tawh bawk.

Income Tax Bill, 2025 ah hian section 536 awm in tuna hman mek Income Tax Act, 1961 ah hian section 298 chauh a awm. Dan hmanlaiah hian 14 schedules awm bawkin a thlakna tur bill tharah hian 16 a awm dawn thung a ni. Bill tharah hian a hma ang bawkin chapter 23 awmin phek 622 chauh a awm tawh ang. Income Tax Act, 1961 ah hian phek 880 a awm thung.

Dan tharah hian Central Board of Direct Taxes (CBDT) chuan chhiah lak dan tur ruangam leh dan te an duang thei dawn a, tehna hrang hrang bakah digital hmanga chhiah peka endik te pawh chu dan awmsa khawih danglam loin Clause 533 hian a phalsak vek tawh dawn a ni.

CBDT chuan dan thar hi hman nuam, hriatfiah awlsam leh chiang zawk tura duan a ni tih sawiin harsatna awm thei, inkhinna leh chhiah petu tana tax nihphung hriatfiah awlsam zawk tur atana dan thar duang turin committee a din a ni. Income Tax bill thar duang tur hian sub-committee peng 22 din an ni. Bill thar hi pharh a nih hnu hian parliamentary standing committee-in a zirchiang leh ang.

IncomeTax Department hian stakeholder hnen atangin Income Tax Act hmanlai te ennawn tura thurawn pekna hi vawi 6,500 lai an dawng a ni.