Sipaiten Pakistan ram chhungah beihpui thlak

Indian Army chuan Pakistan nena inrina, Line of Control (LoC) pelin Pakistan ram chhunga firfiakte lakah beihpui an thlak a, firfiak eng emaw zat an kaphlum niin a sawi.

Director General of Military Operation (DGMO) Lt General Ranbir Singh chuan nimin khan Ministry of External Affairs official-te'n joint press conference neiin, Pakistan ram china surgical strike an neih thu hi a sawi.

Surgical strike neihnaah hian special commando-te tirh an ni a, Nilaini zan khan LoC kaltlangin Pakistan-Occupied Kashmir (PoK)-ah firfiakte an bei a, an vai hian him takin an rawn kir leh a ni. Beihpui thlaknaah hian Air Force lam an tel lo.

Sipaite chuan PoK-a beihpui an thlakah hian India rama rawn luh ruk tum, firfiakte awmhmun chu an bitum ber a ni. Kar khat chhung uluk taka an awmna hmunte hi an zirchian hnuah, LoC aṭanga km 1-3 inkara hlaa awm, firfiakte awm hmun pasarih an bei a ni. Nilaini zan zanlai aṭangin beihpui hi thlak ṭanin, nimin zing dar 4.30 vel khan an zo a ni.

PoK-a beihpui thlak hi Nilaini zan, zankhua khan Defence Minister Manohar Parrikar, Army chief General Dalbir Singh Suhag, National Security Advisor Ajit Doval-ten New Delhi-a Army headquarters aṭangin an lo vil a ni. Surgical strike neih dawn vang hian Parrikar leh Doval hian Nilaini zana Coast Guard commander-te nena zanriah an kilho tur pawh an ṭhulh phah a ni.

Sipaiten PoK-ah beihpui an thlak tih thu sawichhuah a nih hnuah Pakistan Prime Minister Nawaz Sharif-a chuan India sipaite chetdan na takin a sawisel. Pakistan chuan a ram venghim turin sipai a nei ṭha tawk a, an ram thuneihna ngai pawimawh loa beitute chu an tichhe vek thei a ni, a ti.

Hetihlai hian sipai hotu, Lt Gen Singh chuan Pakistan ram china surgical strike an neih chungchang chu nimin zing khan Pakistan DMGO hnenah a hriattir nghal tih a sawi.

Nimin vek khan Jammu and Kashmir-a Pooch district-a LoC-ah ram pahnih sipaite hi an inkap a, Pakistan sipai pahnih an thi.