SAARC summit a hun takah neih tum : Nepal

Pakistan khawpui, Islamabad-a November 9-10 a South Asian Association for Regional Cooperation (SAARC) Summit vawi 19-na neih turah India, Bhutan, Bangladesh leh Afghanistan ramten tel an tum loh thu an sawi a, hei vang hian summit neih hun hi sawn a ni maithei nia sawi a ni.

Mahse SAARC Chair hna chelh mektu, Nepal ram chuan thuchhuah siamin, a hun pangngaiah summit hi neih a nih theih nan boruak ṭha siam turin member ramte a ngen.

Pakistan firfiakten Jammu and Kashmir-a Uri army camp bei a, sipai 18 an kahhlum avangin Pakistan leh India inkar boruak hi a ṭha lo zual a, hei vang hian boruak awm dan a thlirin Islamabad-a summit neih chu India-in a boycott a ni. Summit-a India a tel dawn lo tih puan a nih hnu hian Bhutan, Bangladesh leh Afghanistan ram pawhin tel an tum loh thu an sawi ve nghal a ni.

Member ram pariat awmna, SAARC-a member pali-te'n tel an tum loh avangin, member dang - Pakistan, Nepal, Maldive leh Sri Lanka ramte hian summit hi an kaltlangpui dawn em tih hriatchian a la ni lo.

Hetih lai hian SAARC rules chuan member ram zinga pakhat pawh a tel duh loh chuan summit hi neih theih a ni lo tia tarlan a nih thu sawiin, Pakistan official Sartaj Aziz chuan India-in tel lo a tum ṭum khatna a ni lo a ti a, India vang hian ṭum li chu summit neih hun hi sawn hlat a lo ni tawh a ni, a ti.