SC-in loneitute hnenah Singur ram pe let turin hriattir

Supreme Court chuan kum 2006-a West Bengal sorkarin Nano car siamna hmun atana Tata Motors hnena rama a pek chu loneitute hnenah pe kir leh turin nimin khan a hriattir.

SC chuan West Bengal sorkar hnenah Singur ram chu la let a, kar 12 chhung ngeia a neitute hnenah pe kir turin a hriattir. Hei bakah hian ram neitu, sorkar hnen aṭanga an ram laksak avanga z·ngnadawmna lo dawng tawhte pawh kum 10 chhung an eizawnna hna chhunzawm thei loa siam an nih avangin, an sum dawn pawh an pekir tur a ni lo, a ti.

Tata Motors hian Singur-a Nano plant siamna tura ram a neih danah dan kalhin a che niin SC chuan a sawi. Tata ram neih dan chungchangah hian petition eng emaw zat thehluh a lo ni tawh a ni.

Justice V Gopala Gowda leh Justice Arun Mishra awmna bench chuan kum 2008-a West Bengal-a Left Front sorkarin Singur ram a laksak dan chungchangah petition an thehluhte a ngaihtuah hnuin, nimin khan a thutlukna siam hi a puang a ni. Tata-te ram pek an nih dan hi Association for the Protection of Democratic Rights pawhin alo khing tawh a, vantlang hmun atan tiin sorkarin a laksak hnuah Nano project siamna turin Tata Motors kutah hian a hlan a ni, an ti. Hei hi dan kalh a ni a, land acquisition law palzutna a ni bawk tih an sawi.

Singur aṭang hian Tata Motors hian Nano car project siamna tur hi kum riat kaltaah khan Gujarat-ah a lo sawn tawh a, an ram luah chungchang hi kumin state assembly inthlan dawnah pawh khan an buaipui lian ber zingah a la tel a ni. Inthlan dawna campaign-naah pawh Chief Minister Mamata Banerjee chuan an sorkar chuan, Singur ram chu a neitute hnenah pekkir leh a lo tiam tawh a ni.

Hetihlai hian CPM state secretary Surya Kanta Mishra chuan ram pekkir leh hi thil theih loh a nih thu a sawi a, Bengal aṭangin Nano project chu chhuahtir ni lo se chuan Singur bial chauh ni lo, Bengal pumpuiin industry lamah nasa takin hma a sawn phah dawn a ni, a ti.

Kum 2006 khan, khatih laia Chief Minister Buddhadeb Battacharya kaihhruai CPM sorkar chuan Tata Motors-in cheng nuai khat man, Nano car siamna tur chu Singur hmunah an siam dawn tih a lo puang tawh a, hemi atan hian Singur ram acre 997-a zau pek an ni. Mahse hetihlaia eptu pawl, Mamata Banerjee party Trinamool Congress chuan loneituten ram laksak tur hi nasa takin an dodal a, nawrh te huaihawtin tharum thawhna te a thlen phah hial a ni. Eptute dodalna karah Tata hian an plant hi an siam zo a, kum 2008 khan Delhi auto show-ah Nano car model hi an phochhuak a ni. Mahse eptu party-te'n an dodal chhunzawm zel avangin kum 2008, October thla khan Singur aṭangin Gujarat-a Sanand hmunah Nano plant hi sawn a ni ta a ni.