Kashmir-ah buaina chhuak thar leh

Tualchhung buaina thlen vanga Jammu and Kashmir-a ni 50 chuang zet curfew puan chu hlih a ni a, mahse curfew hlih a nih hnu hian buaina chhuak thar lehin civil mi pakhat a thi a, mi dang paliin hliam an tuar.

Nimin khan Baramulla district-a Nadihaal bialah nawrh huaihawtten Army convoy chu lunga tawngin an lo bei a ni. Zingkarah thei phurtu truck chu security force-te'n dangin a tlanchhuah an phal lo a, hei vang hian mipuite thinrimin army convoy chu an bei ta niin an sawi. Sipaite chuan mipuite hnawhdarh nan silai an hmetpuak a, mi pakhat a thi a ni.

Ni 53 hnuah Kashmir Valley pumpuiah nimin khan curfew hi hlih a ni a, mahse hmun ṭhenkhatah zing aṭangin buaina a chhuak zui nghal a ni.

Inlakkhran duhtu pawlte chuan vawiin thleng hian lungawi lohna lantir chhunzawm an tum a, hei vang hian sumdawnna hmunte pawh khar an la ni a, public transport pawh kawtthlerah an la tlanchhuak lo.

Kashmir buaina chinfel dan ngaihtuah a, pawl hrang hrang aiawhte kawm kual turin September 4-5 hian Home Minister Rajnath Singh leh Finance Minister Arun Jaitley-te kaihhruain all party team, member 35 awmna chuan Kashmir hi an tlawh dawn. All-party team hi Kashmir pana an chhuah hma, September 3 hian official-te hian thil awmdante an hrilhfiah hmasa phawt dawn niin Home Ministry official chuan a sawi.