Kashmir-a hmun pathumah curfew puang leh

Kashmir tualchhung buaina thleng vanga ni 50 chuang curfew puan chu hlih a nih hnuin Nilaini khan buaina a chhuak thar leh a, inlakhran duhtu pawlten nawrh an huaihawt chu September 8 thleng an pawtsei leh bawk. Hei vang hian thuneitute chuan nimin khan Kashmir Valley-a hmun pathumah curfew an puang leh.

Senior police official chuan Nowhatta leh MR Gunj police station area leh Baramulla-ah curfew hi puan a nih thu a sawi.

Ni 53 chhung curfew puan a nih hnuah Nilaini khan Valley pum≠ah curfew hi hlih a ni a, mahse hemi ni vek hian mipui thinrim pungkhawm chuan Baramulla district-a Rafiabad hmunah army convoy chu lungin an tawng a, sipaiten mipui hnawhdarh nana silai an hmehpuahah kum 18 mi, Danish Ahmad a thi. Mipui pungkhawm hian Peoples Democratic Party (PDP) Rajya Sabha member Nazir Ahmad Laway-a in, Kulgam district-a Chawalgam khua ami chu an halsak bawk.

Nimin zing khan Sopore khuaah security force-te chu mipuiin lungin an tawng leh a, Nawa Kadal khuaah motor an hal bawk.

Hetihlai hian inlakhran duhtute chuan September 8 thleng nawrh huaihawt chhunzawm an tum tih an sawi.

Sorkar laipui chuan inlakhran duhtu pawl hruaitu chungah na zawka action lak a tum a, an pawl hruaitu Syed Ali Shah Geelani, Mirwaiz Farooq leh Yasin Malik-te tana air ticket, hotel leh taxi service a ngaihtuah sak
ṭhin pawh tihtawp a tum. BHP kaihhruai sorkar chuan Jammu and Kashmir sorkar hnenah pawh state sorkarin hetiang thil a buaipui sak ṭhin pawh titawp turin a ngen bawk.

Inlakhran duhtu pawl hruaitute enkawlna atan hian kumtin cheng vaibelchhe 10 vel sen a ni a, senso zinga 90% hi sorkar laipuiin a tum a, state sorkarin 10% a tum thung. Anmahni veng tur hian police 950 hman mek an ni bawk a, venghimtu pekte tihtawp chungchang hi state sorkarin a rel tur a ni.