Hnathawktu vaibelchhe 15 nuar dawn

Central trade union (CTU) 10-te chuan minimum wages tihsan leh unorganised worker-te tana social security siamsak phutin vawiin hian nawrh an huaihawt dawn. Nawrh hi state hrang hranga hnathawktu mi vaibelchhe 15 chuangin an zawm dawn a ni.

Union hruaitute chuan state 10-ah total bandh huaihawt a ni anga, state dangah chuan kawng dan a ni thung dawn tih an sawi.

All India Trade Union Congress national secretary Amarjeet Kaur chuan union 10 intelkhawmte press conference an buatsaihah hemi chungchang hi sawiin, "Sorkar scheme hnuaia hnathawkte chuan nawrh hi an zawm vek daw a, nikuma nawrh huaihawt aiin a lian zawk dawn a ni. Hnathawktu vaibelchhe 15 chuang an tel kan beisei a, hei hi sorkar kan chhanletna a ni" a ti.

Bharatiya Mazdoor Sangh chuan nawrh huaihawt hi an zawm ve dawn lo tih an sawi a, mahse hei hian nghawng a nei lian dawn lo niin union hruaitute chuan an sawi. Trade union-te hi nawrh huaihawt lo tura ngen ni mah se, sorkar laipuiin an thil phutte a tihhlawhtlin sak duh loh avangin kaltlangpui an tum tih an sawi. Thawhlehni khan Finance Minister Arun Jaitley-a chuan kum hnih kalta chhunga state employee-te bonus chu sorkarin a pekchhuak tur thu leh, unskilled labourer-te tan minimum wage pawh tihpun a nih tur thu sawi mah se, trade union-te hi an la lungawi thei lo a ni.

Prime Minister Narendra Modi-a kaihhruai sorkar chuan kumin chhung hian privatisation kaltlangin cheng tluklehdingawn 560 hmuh theih a tum a, hei vang hian company eng emaw zat a kharsak a ni. Nikum chhung khan state sorkar enkawl company 77-te sum hloh zat chu dollar tluklehdingawn li a tling a ni.

CTU chuan sorkar laipuiin hna≠thawktu hmakhua ngai loa policy a siam danglam avangn lungawi lohna lantira nawrh huaihawt tur an ni tih an sawi.