Senate-in Brazil President Dilma Rouseff-i ban President thar la lut nghal

Brazil President Dilma Rousseff-i (68) chu an ram budget indaihlohna thup tuma dik lo taka thiltiah puh a nih avanga Senate-in a chungchang a ngaihtuah hnuah, member tam zawkin president a nihna aṭanga ban an duh avangin ban a ni ta.

Senate-a vote laknaah, senator 61-in President hi ban an duh a, hetihlai hian a thlawp lamah member 20 chauhin vote an thlak a ni.

President aṭanga Rousseff-i ban a nih hnu hian a chungchang ngaihtuah a nih laia acting president hna lo chelhtu, Michel Temer-a (75) chu President puitling tan lakluh nghal a ni a, Rousseff-in term la neih, kum 2019 thleng President hna hi a chelh zui ang.

Senate hian Dilma Rousseff-i paihthlakna tur hi thlawp mah se, kum riat chhung politics khel thei lo tura hrem rawtna erawh a thlawp lo thung.

Kum 2014 inthlan dawn khan, Rousseff-i hian President atana thlan nawn a nih theih nan an ram budget-a sum indaih lohna awmte thup nan, state bank-a pawisa te chu dik lo takin a hmang nia puh a ni. Hei hian an ramin sum lama harsatna a tawh meka, an buaina tibelhchhahtu nia sawi a ni. A chungthu ngaihtuah a nih dawn vang hian President a nihna aṭangin chawlh lailawk tir a ni a, hetih chhung hian Michel Temer chuan a ai alo awh a ni.

Thawhṭanni khan Senate chuan darkar 14 chhung zet Rousseff-i chungchang hi a ngaihtuah a, Se≠nate hmaah hian Rousseff-i chuan tih dik loh engmah a neih loh thu leh, democracy tundin a nih theihna atan president paihthlakna tur thlawp zawnga vote lo turin a ngen. Mahse vote lak a nih hnuah paihthlak a ni ta tho a ni.

Dilma Rousseff-i chuan eirukna lama inhnamhnawih hrang hrangte zau taka chhui a remtih avangin President a nihna aṭangin paihthlak a ni ta niin a sawi. Eiru chhuinaah hian politician lar tak tak eng emaw zat chu thubuai siamsak an ni tawh.

Senate-in President paihthla tura thutlukna a siam aṭanga darkar hnih hnuah President thar atana lakluh turin Temer hi Congress-ah a thleng ve nghal a ni. Temer chuan lakluh a nih hnuah a minister-te chu Rousseff-i paihthlak chungchanga sawiselna nasa tak awm mekah, sorkar humhalh kawnga theihtawp chhuah turin a ngen. Brazil sum leh pai dinhmun siamṭha turin Congress chu ṭha taka thawhpui turin a hrilh bawk.

President thar Temer hian Rousseff-i party, Workers' Party-in social programme a siam eng emaw zat chu tihtawp a tum nghal dawn nia sawi a ni. President atana lakluh a nih hnu hian Temer hi G20 summit hmang turin China a pan nghal a ni.

Dilma Rousseff

Kum 1947-ah a piang a, upper middle class chhungkuaah a seilian. A pa hi Bulgaria aṭanga pem lut a ni.

Kum 1964-ah Brazil military dic­ta­torship dodaltu, left-wing movement a zawm.

Kum 1970-ah man a ni a, kum thum chhung a tang. A tan chhungin nghaisak a tawk nasa hle nia sawi a ni.

Luiz Inacio Lula da Silva kaih­hruai sorkar hnuaiah, kum 2003-2011 chhung khan dinhmun pawi­mawh tak tak a chang

Kum 2011-ah Brazil rama hmeichhe president hmasa ber turin thlan tlin a ni.

Kum 2014-ah President atan thlan nawn a ni.

Kum 2016, August 31-ah President a nihna aṭangin paihthlak a ni.