Delhi rel station-a inpawngnekna thlengah mi 18 thi

New Delhi rel station-ah Inrinni liamta, February 15 zan khan Prayagraj-a Maha Kumbh hman naa kal turte inpawngnekna a thleng a, mi 18 an thi. Hliam tuar eng emaw zat an awm bawk.

In pawngnekna chhuah chhan tak hi hriat la ni lo mah se Maha Kumbh hman tum, rel station platform 14 leh 15-a pungkhawmte chu rel pahnih cancel a nih thu an hriatin an innek buai ta nia sawi a ni. Thi zinga 14 hi hmeichhia an ni a, naupang panga an tel bawk a ni.

"Station-a pung khawm te chu aurinna hmangin in hawr khawm tam lo tura hrilh leh hriattir an ni a, mahse mipui lam hi kaihhruai theih loh khawpin an awm bakah, kaihhruaina puante hi an ngai pawimawhlo a ni" tiin IAF sergeant chuan rel station-a thil thleng chungchang hi a sawi.

Chhiatna thleng vanga thi chhungte hnenah Railway chuan zangnadawmna, Rs nuai 10 ṭheuh an pek tur thu nimin khan a tarlang. Hliam tuar na zualte hnena Rs nuai 2.5 leh hliam tenau deuhte hnena Rs nuai khat ṭheuh pek an ni dawn tih a sawi bawk. Chhiatna thlen dan chhui chiang a, zirchianna nei turin member pahnih awmna committee din nghal a ni bawk.

Prime minister Narendra Modi chuan a X-ah New Delhi rel station-a in pawngnekna thleng vanga chhiatna thleng chuan a rilru a ti na hle tih a sawi. Nunna chan chhungte a tawrhpui thu leh, hliam tuarte pawh an dam leh thuai a duhsak thu a sawi.

Congress party chuan chhiatna thleng chungchangah hian sorkar chu demin, thudik thup tumah an puh bakah Railway inrelbawlna chhiat vangah leh sorkarin a ngaihthah vanga thleng niin an puh. Railway Minister chu a nihna aṭanga bang turin an phut bawk.