India ramah hripui kai pung zel Maharashtra-ah nuai 12 chuangin kai tawh

India ramah hri kai hmuh chhuah thar an pung zel a, sorkar report aṭanga a lan dan chuan mi 54,87,580-in hripui hi an kai tawh a, heng zinga 43,96,399 chu an dam leh tawh laiin 87,882 chuan an thihpui thung a, 10,03,299-in hri an la kai mek a ni.

Union Health Minister Dr Harsh Vardhan chuan Pathianni khan Lok Sabha inkhawmah coronavirus damdawi chi li chu pre-clinical trial nei turin advanced stage-ah an awm tawh tih a sawi. 

Hri kai tamna ber state Maharashtra-ah chuan mi nuai 12 chuangin hri an kai tawh. Sikul hawn chungchangah state ṭhenkhatin sorkar laipui thuchhuah zawm tum mah se  Delhi, Maharashtra, Tamil Nadu, Karnataka, Gujarat, Kerala, Uttar Pradesh, Uttarakhand leh West Bengal-te chuan sikul hawn an la phal rih loh. Assam, Himachal Pradesh, Nagaland, Punjab, Andhra Pradesh, Meghalaya leh Jammu and Kashmir-te erawh chuan phal chin neiin sikul an hawng tawh thung.

Ministry of Health and Family Welfare-in nimina report an tihchhuahah chuan Pathianni khan hri kai hmuh chhuah thar 86,961 an awm leh a, dama puan 93,356 awm lehin thihpui 1,130 an awm a ni,.

Khawvel ram hrang hrang zinga hri kai tamna ber dawttu India ramah hian ni thum chhung chu a zawnin hri kai hmuh chhuah thar aiin dama puan an tam tawh zawk.

Enkawl dam rate pawh a sang tawh hle a 80.12% ni tawhin hri kai mek rate hi 18.28% a ni bawk. Thihpui rate chu 1.60% a ni a, khawvela thihpui rate hniam ber zingah a tel pha a ni.

Indian Council of Medical Research (ICMR) chuan nimina report an tihchhuahah Pathianni khan sample 7,31,534 an endik leh tih an tarlang a, hri len ṭantirh aṭanga nimin thleng khan sample 6,43,92,594 an endik tawh.

ICMR hian sample endikna tura laboratory pawmpui 1,774 an nei tawh a, chung zinga 1,062 chu sorkar laboratory niin 712 chu private laboratory a ni thung.

India ram State/UT zinga hri kai tamna ber Maharashtra-ah chuan nimina sorkar report tihchhuah thlengin mi 12,08,642-in hri an kai tawh a, Pathianni khan hri kai hmuh chhuah thar 20,627 an awm leh a ni. Maha-ah hian ni eng emaw zat chhung chu ni khatah hri kai hmuh chhuah sing hnih chuang an awm tawh. 

Hetih lai hian enkawl dam pawh an tam tawh hle a, 8,84,341 chu an dam leh tawh a, mi 32,671-in an thihpui tawh bawk a, 2,91,630-in hri an kai tawh.

Maha tih loha hri kai tamna ber Andhra Pradesh-ah chuan hri kai 6,25,514 an awm tawh a,  heng zinga 78,836 hian hri an la kai mek.

State/UT 16 laiah hri kai nuai chuang an awm tawh a- Maharashtra, Andhra Pradesh, Tamil Nadu, Karnataka, Uttar Pradesh, Delhi, West Bengal, Odisha, Telangana, Bihar, Assam, Kerala, Gujarat, Rajasthan, Haryana leh Madhya Pradesh-ahte nuai chuangin hri an kai tawh a ni.