Rajya Sabha-a eptu MP 8 suspend

Pathiannia Rajya Sabha rorel inkhawm neih ṭuma farmer bill chung changa House chhunga an chet dan mawi loh avangin eptu pawl MP pariatte chu nimin khan kar khat chhung atan suspend an ni. 

Heng mi pariatte suspend an nih theih nan hian house-ah motion put luh a ni a, eptuten suspend chu an duh loh thu au pui mah se heng MP pariatte hi suspend an ni ta tho a ni. Rajya Sabha deputy chairman Sabha Harivansh lakah eptute chuan no-confidence motion an pu lut ve bawk a, hei erawh chairman-in a pawmsak lo thung.

Eptu MP pariat suspend zingah hian Trinamool Congress floor leader Derek O’Brien leh Sanjay Singh (AAP) pawh an tel a ni. Anni bakah hian Congress aṭangin Rajeev Satav, Syed Nasir Hussain leh Ripun Borah  an tel a, CPIM aṭangin KK Ragesh, Elamaram Kareem leh Trinamool party aṭangin Dola Sen-te chu suspend an ni. 

Pathianni khan Rajya Sabha inkhawmah farmer bill duhlohna lantir vangin buaina a chhuak a, eptute chu dawhkan chungah te lawnin, microphone-te pawh an tichhia a ni. Chawhnu dar khatah inkhawm hi tihtawp a ni a, hemi hnu pawh han eptu member-te hian bill an duh lohna lantirin House hi  chhuahsan mai duh loin Lok Sabha rorel inkhawm ṭan hun tur, chawhnu dar thum thleng an ṭhu lui. 

The Farmers (Empowerment and Protection) Agreement leh The Essential Commodities (Amendment) Ordinance, 2020 chu Rajya Sabha-ah hian voice vote hmangin pass hman a ni a, The Essential Commodities (Amendment) Ordinance, 2020 erawh chu inkhawm tihtawp a nih tak avangin an pass hman ta lo.