Mi thianghlimah Mother Teresa puang dawn
Pathianni hian Roman Catholic Kohhran hruaitu, Pope Francis chuan Vatican-a St. Peter's Square-ah Mother Teresa chu mi thianghlimah a puang dawn ta.
Kolkata khawpuia mi rethei leh enkawltu neilote rawngbawl saka a hun pum hmang zo tu, Mother Teresa hi kum 1997, September 5 khan kum 87 mi niin a thi a, a thih aṭanga kum 19-naah mi thianghlimah puan a ni dawn a ni. A thih lai hian a pawl din, Missionaries of Charity chuan sakhaw rawngbawl tura hmeichhe inpumpek (nun) 4,000 dawn a nei hman a, khawvel hmun hrang hrangah fahrah, chenna tur nei lo leh damlote enkawlna hmun 600 an nei. Mi retheite tana a inpekna leh a rawngbawlna avang hian chawimawina hrang hrang pawh a lo dawng tawh a ni.
Mother Teresa mi thianghlima puanna inkhawmah hian mi ṭhahnem tak an tel beisei a ni a, West Bengal Chief Minister Mamata Banerjee-i chu he hun hmang tur hian Rome lam a pan tawh a, official 12 in an zui.
Mi thianghlima Mother Teresa puan anih rual hian Maharashtra-a Virar khuaa Catholic kohhran chuan an kohhran hming chu ëSt. Mother Teresa Churchí tiin an thlak ve nghal dawn a ni. Mother Teresa hian kum 1986 khan Virar khua hi a lo tlawh tawh a ni.
Secretary to Archbishop, Diocese of Vasai Father Richard Dabre chuan, "Mother hian he Diocese mipuite hi mal a lo sawm tawh a, Cardinal Gracias Hospital zauhna pawh hawngin, ṭhalaite inkhawmnaah thu pawh a sawi tawh a ni" a ti. He Biak-In hian Mother Teresa-i thisen pawh glass bawmah dahin an kawl ṭha a, ramchhung aṭangin mi tam takin an tlawh tawh a ni. Biak-In chhungah hian kum 2012 khan Makarana marble var hmanga Mother Teresa lim siam pawh dah a ni bawk.
Mother Teresa
θ Kum 1910, August 26-ah Albania ram, tuna Skopje, Macdeonia ni taah Anjeze Gonxhe Bojaxhiu tih hming puin a piang. Macedonia ramah kum 18 a awm a, Ireland-ah insawnin heta ṭang hian India ramah a insawn leh a, a thih thlengin a awm.
θ Kum 1928-ah Loreto Abbey, Ireland-ah Sisters of Loreto a zawm a, missionary nih tumin English ṭawng a zir.
θ Kum 1929-ah India ram a thleng a, Darjeeling-ah Bengali ṭawngte zirin St Teresa School-ah a thawk.
θ Kum 1931, May 24 ah nun ni turin thutiam hmasa ber a la a, a hming atan Therese de Lisieux tih a thlang. Mahse convent-a nun pakhat chuan he hming hi a lo thlan tawh avangin Teresa tiin a thlak.
θ Kum 1937, May 14-ah thutiam hnuhnung la lehin, Calcutta khawchhak lama Entally-a Loreto convent school-ah a thawk a, kum sawmhnih dawn thawkin kum 1944 khan headmistress atan ruat a ni.
θ Kum 1948-ah missionary hna thawk ṭanin, India khua leh tui nihna pawh a nei a, Patna-ah Holy Family Hospital-ah medical training a neih hnuain mi retheite awmna hmunah rawngbawlin a chhuak.
θ Kum 1950-ah Vatican aṭanga phalna a hmuh hnuin Missionaries of Charity Order a din. He pawlin a tum ber chu rilṭam leh mangang, mi rethei, fahrah leh dam lo, enkawltu neilote tuamhlawm leh chhawmdawl a ni.
θ Missionaries of Charity hi a din tirh chuan member 19 chauh an awm a, kum 1997-ah chuan nun 4,000 chuang an awm tawh a ni.
θ Mother Teresa hian a rawngbawlna avang hian chawimawina hrang hrang pawh a lo dawng tawh a, a
chawimawina dawnte -
India ram chhungah :
θ Kum 1962-ah Padhma Shri pek a ni
θ Kum 1969-ah Jawaharlal Nehru Award for International Understanding an hlan
θ Kum 1980-ah India rama civil mite chawimawina sang ber, Bharat Ratna hlan a ni.
θ Kum 2010, August 28-ah India sorkar chuan Mother Teresa chawimawina atan a lem chuanna cheng 5 thir a tichhuak.
Ram pawnah :
θ Kum 1962-ah South leh East Asia-a a hnathawh ṭhat avangin Philippines chuan Ramon Magsaysay Award a hlan.
θ Kum 1971-ah Paul VI chuan Pope John XXII Peace Prize a hlan.
θ Kum 1976-ah Pacem in Terris Award hlan a ni.
θ Kum 1979-ah khawvel chawimawina sang, Nobel Peace Prize hlan a ni.
θ Kum 1982-ah Honorary Companion of the Order of Australia atan ruat a ni.
θ Kum 1983-ah UK chuan Order of Merit a hlan.
θ Kum 1994-ah Albania ramin Golden Honour of the Nation a hlan.
θ Kum 1996-ah US-in Honorary citizenship of the United States a hlan.