President hnena thawn turin GST Bill peih tawh

Union Finance Minister Arun Jaitley-a chuan Parliament-in a pass tawh, Goods and Services Tax (GST) Constitution amend Bill chu state 16-in an pawm tawh avangin President pawmpuina la turin thawn theih a ni tawh tih a sawi.

Arun Jaitley chuan a twitter-ah hemi chungchang hi tarlangin,"State pawm tura mamawh zatten an pawm tawh avangin GST Constitution Amendment Bill chu President hnenah thawn theih a ni ta" a ti.

Revenue Secretary Hasmukh Adhia pawhin thuchhuah siamin, sorkar laipui chuan state pawmpuina mamawh zat hmu tura ni 30 a ruahman laiin, a mamawh zat chu ni 23 chhungin a hmu thei ta niin a sawi.

Sorkar laipui chuan nakkum April 1 aṭanga GST hi hman ṭan turin ruahmanna a siam a, hmang thei ngei turin ṭan pawh a la nasa hle.

August 8 khan Parliament chuan Constitution Amendment Bill hi a pass a, hemi hnu hian state assembly 16-ah pawm a ni tawh. GST hi a taka kalpui tur chuan state assembly zinga 50% in an pawm ve leh phawt a ngai a ni.

State hrang hrang zingah Assam assembly chuan GST Bill hi a pawm hmasa ber a, Assam bakah Bihar (August 16), Jharkhand (August 17), Chhattisgarh (August 22), Himachal Pra≠desh (August 22), Gujarat (August 23), Madhya Pradesh and Delhi (August 24), Nagaland (August 24), Maharashtra, Haryana, Sikkim (August 29), Mizoram, Telangana (August 30), Goa (August 31) leh Odisha (September 1) te pawhin an pawm tawh a ni.