Ram pahnih tlawh turin PM zin chhuak

Prime Minister Narendra Modi chu nimin khan Vietnam leh China ram tlawh turin a zin chhuak a, Vietnam ram a tlawh hmasa ang.

PM hian vawiinah Hangzhou, China-ah G-20 summit hmang turin Vietnam hi a chhuahsan leh nghal ang. A cham chhung hian Vietnam President Tran Dai Quang leh Prime Minister Nguyen Xuan Phuc-te kawmin, ram pahihten defence, security leh trade lama thawhdunna nghet zawk an neih theih dan turte a sawipui dawn a ni. Hei bakah hian Vietnam rama India-in oil zawn hna a thawh mek chungchang pawh a sawipui ang. Vietnam ramah hian ONGC Videsh Limited chuan oil zawn hna a thawk mek a ni.

G-20 summit hi September 4-5 hian neih a ni dawn a, summit-ah hian Modi chuan ramri kaltlanga firfiakte chetna thleng ṭhin te, firfiakte ṭanpuina sum pek a nih dan te, chhiah awl ruk chungchangte sawichhuah a tum niin External Affairs Ministry Secretary (West) Sujata Mehta chuan a sawi.

Summit neih denchhen hian PM chuan China President Xi Jinping pawh a kawm nghal dawn a, hei hi Uzbekistan khawpui, Tashkent-a Shanghai Cooperation Organisation (SCO) summit neih ruala meeting an neih hnuah ram hruaitu pahnihten meeting an neih lehna hmasa ber tur a ni.

PM hi September 5-ah China aṭangin a rawn haw ang a, September 7 hian annual India-ASEAN and East Asia summit hmanga ni hnih cham turin Laos ramah a zin leh nghal ang.