All-party team-in Kashmir an thleng

Kashmir tualchhung buaina thleng mek chingfel tur leh bo≠ruak muanawm a awm leh theihna tura hmalak dan tur ngaihtuah turin Union Home Minister Raj≠nath Singh kaihhruai all-party team chuan nimin khan Kashmir an thleng a, ni hnih an cham ang.

All party team hian an cham chhungin Kashmir-a pawl hrang hrang aiawhte an kawm dawn a ni. All party team-ah hian party hrang hrang 20 aṭangin member 30 an awm a ni.

Team member-te chuan party hrang hrangte inkara in hriatthiam lohnate dah ṭhain, Kashmir Valley-a boruak muanawm leh nunphung pangngai a awm leh theihna turin theihtawp an chhuah dawn tih an sawi.

July 8-a security force-te'n Hizbul Mujahideen commander Burhan Wani an kahhlum avanga tualchhung buaina thlengah hian mi 71 in nunna an chan tawh a, hun rei tak curfew puan a ni bawk.

J&K Chief Minister hlui leh Congress hruaitu hlun, Ghulam Nabi Azad-a chuan all party team chu harsatna tawkte thu thlen ngaihthla turin a inpeih reng tih a sawi a, an kal chhan pawh Kashmir mipuite tan a ni tiin, mi tupawhin an state-a boruak muanawm a awm chu an duh vek a ni, a ti.

Team member dang, CPM general secretary Sitram Yechury pawhin all-party aiawhte chu thla hnih liamtaah khan Kashmir-ah hian kal tawh tur an ni tih a sawi a, mahse tuna an kal pawh hian nghawng ṭha tak a thlen ngei a beisei thu a sawi.

LJP hotu leh Union Minister Ram Vilas Paswan chuan MP rualte chu rilru inhawng takin an kal tih sawiin, anmahni be duh leh thu thlen duh neitute chu inbiakna neihpui turin an inpeih reng tih a sawi.

Congress hruaitu Mallikarjun Kharge pawhin, party hrang hrang aiawhte chuan Jammu and Kashmir-in nunphung pangngai a zawh leh theihna turin sorkar hmalakna chu an thlawp tih a sawi bawk. "Boruak ṭha a awm leh theihna turin theihtawp kan chhuah dawn a, sorkar pawh kan thawhpui zel a ni" a ti.

Jammu and Kashmir Chief Minister Mehbooba Mufti-i chuan kar kalta Inrinni khan an state-a inlakhran duhtu pawl hruai≠tu hrang hrangte chu all-party team te nen inbiakna neihpui turin a sawm. Mahse CM sawmna hi an la chhang hlawm lo a ni.

All-party team-in Kashmir an thlen hnu hian Shopian-ah buaina a chhuak thar leh a, mi 10 chuangin hliam an tuar. Nimin zing khan Shopian district-ah mipui lungawi lote chuan kawng an zawh a, administrative complex an hal bawk.

Hetihlai hian India most wanted terrorist leh Hizbul Mujahideen hotu Syed Salahuddin chuan, Kashmir buaina chinfel tuma hmalakna reng reng chu lo dan a tum thu a sawi. Salahuddin chuan Kashmir lakhran duh chungchangah a ngaihdan chu ala ngai reng tih sawiin, Valley pawn lamah buaina thlen belh turin suicide bomber atan Kashmir ṭhalai tam zawk training pek a tum thu a sawi. Salahuddin hi kum 1987-a J&K Assembly inthlanah khan Muslim United Front hmingin a chuh a, mahse a chak zo lo. A chak loh chhanah hian thil dik tawk lo a awm nia sawiin amah thlawptute chuan buaina nasa tak an chawk chhuak a, amah pawh hi Pakistan-ah a tlanchhe zui a ni.