Sipai bangte'n Bihar-a zu khapna dan dodal

Bihar state-a zu khapna dan hman mek chu duh loin kar kalta Zirtawpni khan sipai bangte'n Patna-ah kawng an zawh.

State sorkarin zu khapna dan a siamṭhat hnuah thla li kalta chhung khan sipai 70-te man an ni tawh. Zu khapna danin sipaite a huam tel avang hian lungawi loin, sipai bang sang chuangin kawng hi an zawh a, Governor hnenah memorandum an thehlut nghal bawk.

State excise and prohibition law siamṭhat a nih hnua sipai man zingah hian officer pawh eng emaw zat an tel. Bihar state-a zu khap a nih hnu hian April 5 - August 31 inkar khan dan bawhchhia mi 13,839 te chu man an ni a, jail-a khung an ni tawh.

Sipai bangte kawng zawh hi Raj Bhavan bulah police-te'n an lo dang a, Ex-Servicemen League hruaitu panga-te chuan Governor hnenah hian memorandum hi an thehlut a ni. Leagure president NK Singh chuan, "Ni 15 chhungin hma lak a nih tur thu min lo tiam a, mahse khapna dan siam chungchang hi engmah tihdanglam a nih loh chuan state puma sipaite chuan lungawi lohna kan lantir leh dawn a ni" a ti.

Singh chuan, "Kan dikna humhalh turin kan be a ni. Zu hi kan tan damdawi a ni a, Army rule 32/84 chuan Ministry of Defence aṭangin zu quota kan neih min phalsak a, hei hi min tihtawp sak ngawt thei lo" a ti. Sipaite huam loa zu khap erawh chu a thlawp thu a sawi.