Rajnath Singh-a'n inlakhran duhtu pawl hruaitute sawisel

Jammu and Kashmir tualchhung buaina thleng mek chinfel dan kawng ngaihtuaha Srinagar-a cham mek, Union Home Minister Rajnath Singh chuan inlakhran duhtu pawl hrauitute chu Kashmir buaina chinfel duh tak tak loha a puh.

Rajnath Singh-a kaihhruai member 30 awmna, all-party team chu Jammu and Kashmir-ah hian an cham mek a, Kashmir-a pawl hrang hrang aiawhte pawh an kawm tawh a ni. Nimina Srinagar-a press conference a neihah Singh chuan, "Mi zawng zawngin Kashmir chung≠chang hi an ngaihven a, sorkar laipui pawhin boruak muanawm a awm a, mipuiten nunphung pangngai an zawh leh theihna turin state sorkar chu a thawhpui reng a ni" a ti. Boruak ṭha a awm theih nan sorkar chuan pawl hrang hrangte chu inbiakna neihpui a duh reng tih a sawi bawk.

J&K an thlen hnuah political party leh pawl hrang hrang aiawh mi 300 velin MP-te chu an kawm tawh a, an zinga a tam ber chuan Kashmir Valley-a remna leh muanna a awm leh thuai an duh thu an sawi niin Singh chuan a tarlang.

Inlakhran duhtu pawl hruaitute chuan Pathian≠ni-a all-party team-in hmuh an tum chu an duh lo a, hei hi sawiselin Rajnath Singh chuan an chet dan chu thil mawi lo leh, Kashmir buaina chinfel duh tak tak loah a puh. Singh chuan Jammu and Kashmir chu India ram a ni a, a ni chhunzawm reng dawn tih a sawi bawk.

Jammu and Kashmir Chief Minister Mehbooba Mufti-i chuan inlakhran duhtu pawl, Hurriyat hruai≠tute chu inbiakna neihpui turin a sawm a, CM a nihna ang ni loin People's Democratic Party hruaitu a nihna angin a sawm tih pawh a sawi tel. Mahse Hurriyat hruaitute hian a sawmna hi an hnawl a, hei bakah all party team member, Sitarm Yechury leh midangten hmuh an tum pawhin an lo hmu duh lo a ni.

Hurriyat hruaitu Syed Ali Shah Geelani chuan all-party team member-te hi Srinagar-a a chenna inah a luhtir duh lo a, amah thlawptute chuan MP-te'n a chenna an thlen hian India dodalna thute an lo aupui a ni.