Modi leh UK PM te an inkawm

G20 summit hmanga China rama cham mek, Prime Minister Narendra Modi chuan nimin khan Britain Prime Minister Theresa May a kawm a, ram pahnihten inzawmna ṭha zawk an neih theih dan turte an sawi dun. Hruaitu pahnihte hi summit neih kar lakah an inkawm a ni.

Britain mipuiin European Union aṭanga inlakhran an duh avangin an ram Prime Minister David Cameron chu a bang a, amah thlaktu turin July 13 kha Therasa May-i lakluh a ni. PM atana lak luh a nih hian Modi chuan telephone-in lawmpuina a hlan a, May-i pawhin India nena thawhdunna nghet leh zau zawk neih a duh thute pawh alo hrilh a ni. Nimina an inkawmnaah hian khawvela single market lian ber Britain, EU
aṭanga a inlakhran hnua India leh Britain ram tana thawhdunna siam dan chungchangte an sawi a ni.

Nimina G20 summit ni hnihnaah PM Modi chuan thu sawiin, eirukna do turin member ramte chu theihtawp chhuah turin a ngen. Modi chuan eiruk, sum chheprelh leh chhiah awlrukte tibo tura beihlet chu financial go≠vernace ṭha awmna tura thil pawimawh a nih thu a sawi.

PM Modi hian UK PM bakah Argentina President Mauricio Marcri leh Turkey President Recep Tayyip Erdogan pawh a hmu bawk. Pathianni khan China President Xi Jinping pawh a lo hmu tawh a, Xi nen hian ṭum riat meeting an neihna a ni. President Xi nen hian minute 35 chhung inkawmin, ram pahnihte inlaichinna leh ramri-a harsatna awm chung≠changte an sawidun.