Chhatisgarh-ah Naxal hel 38 inpe

Chhatisgarh-a Narayanpur district-ah nimin khan Naxal hel 38 chu police-te kutah an inpe a, an zingah hian hmeichhia pasarih an tel.

Narayanpur Supe≠rintendent of Police, Abhishek Meena chuan Naxal helte hian Maoist thuthlung leh policy chu a ṭhat tawk lohzia hriain, Narayanpur district head≠quarters-a senior police leh Indo-Tibetan Border Police official-te kutah an inpe niin a sawi. Hel inpe zingah hian luman cheng nuai khat nei mek, Dandakaranya Adivasi Kisan Majdoor Sanghthan hotu Punaye Bai-i pawh a tel.

Naxal hel inpete zinga a tam zawk hi tualthat, mi rawk leh police-te beihnaa tel ṭhin an ni. Mahse Chhatisgarh-ah security force-te'n ngawrh taka beihpui an thlak mek zel avang te, an pawl thuthlungte an duh tak loh avangin thuneitute kutah an inpe niin an sawi.

Hetihlai hian Bihar-a Gaya district-ah nimin khan Naxal helhoin private construction company khawl leh motor an halsak. District police official chuan helho hian Gaya-Wazirganj road-a SP Malik Company Private Limited camp beiin, company motor paruk an hal a, an khawl dahte pawh an halsak bawk niin a sawi. Helho hian sum pe tura an phut angte company lamin a pek duh loh vangin an bei ta nia sawi a ni.

Police official-te chuan helho hian construction company-a thawk ṭhenkhatte pawh an sawisa niin an sawi a, company hian lei dawh hna a thawk mek a ni. Bihar-a construction company-te hnen aṭang hian Maoist helte hian sum an laksak vek a, anni bakah hian sumdawng, contractor leh sorkar hnathawkte hnen aṭang pawhin chhiahte an la bawk ṭhin.