Cauvery lui tui inchuh vangin nawrh huaihawt

Karnataka leh Tamil Nadu state-ten Cauvery lui tui an inchuhna thubuai kal zelah, Surpeme Court chuan Karnataka hnenah lui tui hi Tamil Nadu hnena pe chhuak turin a ti a, hei hi duh loin nimin khan Karnataka-ah nawrh huaihawt a ni.

Thawhṭanni khan Supreme Court chuan Karnataka sorkar hnenah ni 10 chhungin Tamil Nadu state tan Cauvery lui tui chu nitin cusecs 15,000 zel pe chhuak turin a lo hriattir tawh a ni.

Court thupek hi duh loin nimin khan Karnataka-ah nawrh huaihawt a ni a, kawngpui pawimawhte dangin state sorkar pawhin Bengaluru leh Mysuru aṭanga Tamil Nadu leh Kerala pana tlan, bus 700 zet a dintir bawk. Ven thawn thilah Krishna Raja Sagara dam leh Mandya-a Birndavan Gardens pawh ni li chhung atan khar an ni. Nawrh hi Cauvery Hitarakshana Samithi (Cauvery protection committee)-in a huaihawt a ni.

Kawngpui dan a nih bakah, nimin khan Karnataka chhim lam district hrang hranga theatre neitute chuan Tamil movie an tihchhuahte an titawp bawk.

Karnataka Law Minister TB Jaychandra chuan mipuite chu inthunun turin a ngen a, buaina chawk chhuak zawnga che lo turin a ngen. Chief Minister Siddarmaiah pawhin nimin tlai khan Vidahn Sabha-ah all party meeting a ko nghal bawk.

Cauvery Hitarakshana Samithi president leh MP hlui, G Made Gowda chuan state sorkar hnenah Supreme Court thupek hi ngaihtuah ṭha leh tura ngenna thehlut nghal turin a nawr. State Water Resources Minister MB Patil pawh telephone-a biain, an state-a loneitute duh dan leh ṭhatna tur chu ngaihtuahsak turin a ngen.

Karnataka-a loneitute pawhin Cauvery lui tui hi Tamil Nadu hnena an pek ṭhen chuan nasa zawkin lungawi lohna lantir an tum thu an sawi.

Nimina nawrh huai≠hawtna pui ber, Mandya-ah chuan sorkar office-ah mipuite lutin, sorkar hnathawkte chu hna thawh chhunzawm an phalsak lo a, Irrigation leh Public Works Department office te an suasam bawk.