Rahul Gandhi-an UP campaign hawng

Congress vice president Rahul Gadhi chuan Uttar Pradesh assembly inthlan neih tur atana an party campaign chu nimin khan a hawng. Deoria aṭangin 'Kisan Yatra' a nei ṭan nghal bawk.

Rahul Gandhi hian Kisan Yatra chhungin Deoria aṭanga Delhi inkar, km 2,500-a thuiah door-to-door campaign a nei dawn a, Uttar Pradesh-a sorkarna an siam ngei theihna turin a bei dawn a ni.

Rahul chuan nimin vek khan Pachladi khuaah loneitute hmuin an harsatna tawh hrang hrangte a ngaithlaksak a, an loan ba neihte ngaihdam a tiam bakah, kum 2017 assembly inthlana an party thlan tlin an nih chuan loneitute power hmanna man chu 50% a tihhniamsak a tiam.

Loneitute nena meeting an neihah, Rahul chuan sorkar laipui leh UP sorkar chu loneitute leh kuthnathawkte hmakhua ngai lo leh, an harsatnate hai der sakah a puh. "Modi-a kaihhruai sorkar hian sumdawng liante tan thil tam tak a tihsak a ni. Heng mite tan hian thil engmah tihsak lo turin kan ngen a ni lo a, loneitute pawh ngaihsak tel turin kan duh chauh a ni" a ti.

UP-a Samajwadi Party sorkar pawh kut hnathawkte theihnghilhah a puh. "Sugar mills 17 te chu kharsak an ni a, heng thila mawhphurtu ber chu tunge ni ang? Sorkar laipui leh UP sorkar hian loneitute harsatna hi an hriatpui lo a ni" tiin a sawi.

Rahul Gandhi hian Kisan Yatra bul a ṭanna ni hnih chhungin Kushinagar, Gorakhpur, Sant Karbinagar leh Basti-te a kal dawn a ni. Congress party pawh Rahul Gandhi-a yatra neihna tur atan hian a inbuatsaih a, Lucknow-ah party thupuangte awmin a hmasawn dante media mite hnenah an puangzar zel dawn a ni.