Rajnath Singh-an Kashmir chungchang PM a sawipui

Jammu and Kashmir tualchhung buaina chinfel dan ngaihtuaha zin, all party team chu ni hnih an cham hnuin Delhi-ah an kir leh tawh a, team hotu Union Home Minister Rajnath Singh chuan nimin chhun khan Prime Minister Narendra Modi hmuin thil awmdan a sawipui.

All party team hian Kashmir Valley-a political party leh pawl hrang hrang aiawhte an kawm a, mahse inlak hran duhtu pawlte erawh chuan an lo hmu duh lo a ni.

Home Minister chuan inlak hran duhtu, Hurriyat hruaituten MP-te chu lo hmu duh lo mah se, an zinna chu a hlawhchham lo tih a sawi a, mimal leh pawl hrang hrang aiawhte nen inbiakna ṭha tak an nei tih a sawi. Hemi rual hian Hurriyat hruaitute chu a dem thu sawiin, sorkar laipui leh all-party team chuan Kashmir buaina chinfel an duh tak zet a, an hmalakna an lo ngaih pawimawhsak lo chu sawiselin, remna leh muanna a awm duhtute chu inbiakna neihpui turin an inhawng reng tih a sawi.

Nimin khan Srinagar khaw pumah curfew hlih a ni. Kashmir tualchhung buaina chhuak vanga thi mi 72 an tling tawh a, mi 10,000 chuangin hliam an tuar bawk.

BJP chuan J&K-a Hurriyat hruaituten all-party team an lo hmu duh lo chu an dem thu sawiin, an chet dan chu mipuite hmakhua ngai lo leh democracy tundinna tur dodalna a ni a, Kashmir inpumkhatna rilru an pu lo niin an sawi. BJP hruaitu Prem Shukla chuan Rajnath Singh-an inlak hran duhtu pawl hruaitute a demna thu a sawi chu an thlawp tih a tarlang bawk.