Kerala-in Farm law dodalna resolution pass dawn

Kerala khawpui Thiruvananthapuram-ah nimin khan Kerala sorkar cabinet chuan special meeting neiin Nilainia special assembly session neih a, sorkar laipuiin a pawm thar Farm law chungchang sawi an rel thlu.

Special assembly session-ah hian Farm law thar pathum,  CPI(M) kaihhruai Left Democratic Front (LDF) leh Congress kaihhruai United Democratic Front (UDF)-te'n an dodal chu dodalna resolution pass an tum a ni.

Kerala finance minister Thomas Isaac chuan cabinet thutlukna hi sawiin,"Kerala cabinet chuan December 23 hian legislative assembly special seesion ko turin thu a titlu a, sawisel hlawh tak Farm law chungchang sawi hoa hnawl a ni dawn. Kerala chuan loneitute tawrhna hi an hriatpui a ni," a ti.

Governor hnenah special assembly ko tur hian an la ti dawn chauh a, he special session-ah hian Farm law chungchang chiah an sawi dawn bawk. Kerela budget session chu nakkum January 8-ah an nei chauh dawn a ni.

Haryana chief minister Manohar Lal Khattar chuan Pathianni khan Minimum Support Price (MSP) tu emawin paih a tum a nih chuan politics ka chawlhsan anga ka bang ang, a ti. Mipui pungkhawm hmaa thu a sawinaah Manohar Lal Khattar chuan MSP chu a awm reng dawn tih sawiin, tu emawin paih a tum a nih chuan politics a chawlhsan hial dawn thu bakah MSP chu tihtawp a nih dawn loh thu a sawi a ni.

"MSP chu hun kal tawhah pawh a awm a, tunah pawh a awm a, hun lo awm zel turah pawh a awm zel ang," a ti. Haryana CM hian Inrinni khan loneitute'n nasa taka an dodal Fam law chungchangah hian Union agriculture minister Narendra Singh chu Delhi-a a chenna inah Inrinni khan a lo hmu tawh a, sorkar laipui chuan loneitu pawlte chu inbiakna neihpui leh se a duh tih a hrilh a ni.