Reliance Industries Ltd-in Gujarat-ah Khawvela sahuan lian ber an siam dawn

Reliance Industries Ltd chuan Gujarat-a Jamnagar-ah khawvela sahuan lian ber an siam dawn tih an sawi a, Inrinni liam ta khan company executive pawimawhte pawhin hemi chungchang hi thudik a ni tih an nemnghet tawh.

Sahuan an din turah hian nungcha chi hrang hrang 100 vel lai chu dah an ni dawn a, khawvel hmun hrang hrang aṭangin ramsa, sava leh reptile te an lakhawm dawn a ni. Mukesh Ambani fapa Anant Ambani chuan an project thar chu pet project a ni tih sawiin, ram acrre 280 vela zauah sahuan chu an siam dawn tih sawiin; Jamnagar Moti Khavdi-a an company refinery project bulah an siam dawn tih a sawi bawk. He refinery project pawh hi khawvela oil refining complex lian ber a ni.

Sahuan siam hna hi a khaihlak a nih loh chuan kum hnih liam hnu velah chuan hawn hman an inbeisei a,  'Greens Zoological, Rescue & Rehabilitation Kingdom' tih a ni ang. Thuneitu lam aṭang pawhin Reliance hian phalna an la fel tawh tih an sawi. Sahuan chhungah hian section hrang hrang- 'Wild Trail of Gujarat', 'Forest of India', 'Frog House', 'Insect Life', 'Dragon's Land', 'Exotic Island' leh 'Aquatic Kingdom' a awm ang.

Additional director-general of forests (wildlife), ministry of environment, forest and climate change, Soumitra Dasgupta chuan hemi chungchang sawinaah hian private-a sahuan siam chu India ramah thil thar a ni tawh lo tih a sawi a ni.