India-in United Kingdom flight a titawp lailawk

Sorkar laipui chuan nimin khan thuchhuah siamin December 31 thleng atan United Kingdom flight zawng zawng chu a titawp lailawk.

Directorate General of Civil Aviation chuan thuchhuah siamin,"UK dinhmun uluk taka thlirin, India sorkar chuan UK aṭanga India a thlawk lut tur thlawhtheihna zawng zawng chu December 31 thleng a titawp lailawk a ni," tia tarlangin, he hun chhung zawng hian India aṭanga UK-a thlawhtheihna thlawk tur zawng zawng pawh tihtawp lailawk a ni dawn tih an tarlang a ni.

Nilaini aṭang hian thlawhtheihna thlawk tur zawng zawng hi tihtawp nghal a ni dawn a, hemi hmaa UK aṭanga thlawhtheihna hmanga India rama lut zawng zawng chu airport an lo thlen velah hri an kai em tih enfiah an ni nghal dawn bawk. Nimin zingah khan UK-ah hripui chi thar a leng tih report a awm chungchang hi ngaihtuahin  joint monitoring group chuan meeting  an nei a, hemi hnu hian sorkar laipui chuan a thutlukna hi a puangzar ta a ni.

India hma hian ram eng emaw zatin UK flight chu an lo titawp lailawk tawh bawk a, chung zingah chuan Canada, Saudi Arabia leh Europe ram eng emaw zat an tel. Nimina sorkar laipui ṭhutkhawm hma hian Delhi chief minister Arvind Kejriwal chuan sorkar laipui chu UK flight zawng zawng a rang thei ang bera titawp nghal turin a ngen a, twitter-ah hemi chungchang hi tarlangin hemi hnu lawkah hian sorkar laipui hian meeting hi an nei.

Union health minister Dr Harsh Vardhan chuan nimin khan ramchhung mipuite chu UK-a hri leng chi thar a awm avanga chiai lo turin a chah. India Science Festival-a thuthar thehdarhtute a kawmnaah health minister chuan thu belhchian dawl lo vanga chiai a ṭul rih loh thu sawiin, sorkar chuan uluk takin a beng a chhi reng tih a sawi. Kum khat liam ta chhung khan sorkar laipui chuan mipui himna turin  an theih ang tawkin hma an la tawh a, chumi avang chuan chiaina tur a awm lo a ni, a ti.