Kashmir-a inlakhran duhtute thliarhran duh

Jammu and Kashmir-a tualchhung buaina thleng mek chungchang a hmuna enfiah tur leh, buaina chinfel dan ngaihtuaha tlawhtu, all party team member-te chu Delhi an let hnuah nimin khan meeting an nei.

All party team-ah hian party hrang hrang 20 aṭangin MP 30 an tel a, J&K-ah hian ni hnih chamin pawl leh political party hrang hrang aiawhte an kawm. Mahse inlakkhran duhtu pawl hruaitute chuan MP-te hi an lo hmu duh lo thung.

Kashmir-ah hian thla hnih zet tualchhung buaina a chhuak tawh a, mi 70 chuang thiin mi dang 10,000 velin hliam an tuar tawh a ni.

Nimina all-party team hotu, Union Home Minister Rajnath Singh-an meeting a kohah hian team member-te chuan Kashmir chungchanga an ngaihdan hrang hrangte an sawichhuak. Buaina chingfel tura hma laknaah inlakhran duhtu pawlte chu thliarhran a, an chungthu pawh a hrana ngaihtuah an duh thu an sawi.

MP ṭhenkhat chuan J&K sorkar chu buaina chhuak thununna kawngah a hlawhchham nia an ngaih thu leh, political leader ṭhenkhat chuan buaina tipunlun thei zawnga thu dik lo tawk an tihchhuah ṭhin nia an ngaih thu an sawi.

Buaina hi Kashmir chhim lam bialah a hluar a, hei vang hian heng bial mipuite thunun chu thil pawimawh tak a ni, an ti. Member-te chuan Kashmir Valley-a curfew puan chu hlih a, zirna in hrang hrangte pawh hawn a ṭul thu an sawi. Civil mite chung-a khuahkhirhna siam pawh ṭha an tih loh thu an sawi bawk.

Member-ten rawtna an siamah hian mipui thinrim pungkhawmte hnawhdarhna atana sipaiten mu sep, pellet an hman ṭhin chu titawp an rawt a, mu sep kahchhuah avanga hliam tuarte pawh zángnadawmna pek an rawt bawk a ni.