J&K-ah army convoy an bei

Jammu and Kashmir-a Kupwara district-ah firfiakten nimin zing khan army convoy an bei a, sipai pathumin hliam an tuar.

Firfiakte hian Handwara khuaa Kralgund bulah convoy hi an lo bei a, sipaite hian bei let mah se anmahni beitute hi an tlanbo hman a ni. Firfiakte man tum hian sipaite chuan beihpui an thlak chhunzawm nghal a ni.

Sipai hliam tuar zinga pakhat hi a dinhmun a ṭha lo hle a, Srinagar-a Army Hospital-ah hruai a ni.

Tun ṭum hi July 8-a security force-ten Hizbul Mujahideen commander Burhan Wadi an kahhlum hnua firfiakten army convoy an beih ṭum hnihna a ni. Thla hmasa khan Srinagar-Baramulla highway-ah army convoy beih a ni a, spai pahnih leh police pakhat an thi a, mi dang panga-in hliam an tuar.