HC-in Delhi sorkar thuchhuah a sût

Delhi High Court chuan Delhi Chief Minister Arvind Kejriwal-a kaihhruai Aam Aadmi Party (AAP) sorkarin MLA 21-te parliamentary secretary atana ruatna thupek a tihchhuah chu nimin khan a s˚t sak.

Kum 2015, March 13 khan Delhi sorkar hian MLA 21-te chu parliamentary secertary atana ruatna thupek a tichhuak a ni. Mahse Chief Justice Justie G Rohini leh Justice Sangita Dhingra Sehgal awmna bench chuan sorkar hian Lieutenat Governor rawn lo leh a pawmpuina la loin thupek a tichhuak nia sawiin, a sut sak leh ta a ni.

Delhi sorkarin parliamentary secretary 21 a ruat chungchang hi July 13 khan sorkar laipui chuan dodalin, an post hi Constitution-ah emaw, Delhi Members of Legislative Assembly (Removal of Disqualification) Act of 1997 emaw hnuaiah a awm lo tih a sawi a, Parliamentary Secretary to the Chief Minister post chiah a awm a ni, a ti.

Ministry of Home Affairs (MHA) chuan parliamentary secretary thar ruat hi danin a huam tel lo nia sawiin, High Court hi hrilh a ni. He thu hi NGO-in AAP MLA 21-te Parliamentary Secretary atana CM-in a ruatna sut tura PIL an thehluh chungchanga sorkar laipui hnena hriattirna pek a chhan letnaah MHA hian a sawilang a ni.

MHA chuan Delhi sorkar hian parliamentary secretary-te ruat an nih theihna tur hian Delhi Members of Legislative Assembly (Removal of Disqualification) Act chu a siamṭha a, mahse President chuan pawmpui loin bill hi a thawn let a ni.

President-in bill a thawn kir hnu hian MLA-te ban tur hian petition thehluh a ni a, Election Commission-in parliament secretary-a ruatna hi dan kalh nia a sawi chuan heng MLA-te hi ban theih an ni ang.

Mahse AAP sorkar chuan parliamentary secretary a ruat thar vang hian eng office mah siambelh a ni lo a, MLA-te pawh hian hlawh an lak belh lo niin a sawi. Official hna bikah an minister puihte office-ah an hnathawhna tur hmun ruatsak an ni a, sorkar motor an hman phalsak an ni ringawt niin a sawi. Parliamentary secretary-te hi confidential document khawih theihna tur thuneihna pawh an nei lo tih a sawi bawk.

Nimina Delhi Chief Minister Arvind Kejirwal-a'n Punjan a pan tur chu rel station-ah eptu pawl hmeichhiaten lo dangin, AAP miniser hlui Sandeep Kumar-an sex video a tihdarh chung≠changah an lungawi loh thu an sawi a, CM chu Delhi lama kir leh turin an ti. Sandeep Kumar hian hmeichhe pakhat nena mipat hmeichhiat an hmang lai video a tidarh a, hei vang hian minister a nihna aṭangin ban a ni tawh a, a hmeichhe awmpui hian a pawngsual nia a puh avangin thubuai siamsakin kar hmasa khan Kumar hi man a ni tawh bawk.

Delhi Deputy Chief Minister Manish Sisodia chuan Delhi Police-te hnenah CM zin tur chungchang hriattir an ni vek chunga rel station-a eptuten CM an lo nawrbuai thei chu mak a tih thu a sawi. Hmeichhe lungawi lo ten CM an nawrbuai lai hian police-te chuan engmah ti loin an lo thlir a, TV camera-te'n a lak vek a ni tiin, he thil thleng hi a hma aṭanga ruahman lawk vek nia a lan thu a sawi. AAP chuan Delhi Police-te'n Punjab-ah Kejriwal-a venhimna an pe duh lo chu an dem thu an sawi. Hetihlai hian Delhi Police-te hian CM hian state dang a thlen chuan an veng zui thei dawn lo tih an sawi a ni.

Kejriwal-a hi Ludhiana a thlen hnuah pawh Congress party hmeichhe member-te chuan a minister sex scandal chungchangah lungawi lohna an lo lantir zui bawk a, Akali Dal
ṭhalai pawlte pawhin Kejriwal-a chu Punjab-ah lawm a ni lo tih an lo sawi.