AP special package tlangzarh

Sorkar laipuiin Andhra Pradesh state tana special package a siam chu nimin khan Finance Minister Arun Jaitley-a'n a tlangzarh. Cabinet pawmpuina lak leh a ni ang.

BJP kaihhruai NDA sorkar chuan Andhra Pradesh-a Pollavaram irrigation project thawhna sum zawng zawng a tumsak dawn a, hei bakah hian chhiah a laksak danah ngaihnathiamna a siam bawk.

Andhra Pradesh hian Telangana state din tura an state ṭhendarh a nih vangin special status pe turin sorkar laipui a lo phut tawh a ni. Mahse sorkar laipui chuan special status a dil hi a pe lo a, Jaitley chuan chhawmdawlna an pek tur hrang hrang chu special status peka an dawn tur nen a in ang reng niin a sawi.

Telangana state hran siam a nih hnuah Andhra Pradesh hian a sum lakluhna hnar tam tak a chan a, industry lam pawh tam tak a chan tel bawk. NDA sorkar chuan kum 2013-a Prime Minister hlui Manmohan Singh-a'n AP chhawmdawlna tur pek a lo tiam hrang hrangte chu a taka tihpuitling ngei a tum tih a tarlang.

Minister chuan kum 2014, April 1-a national project atana puan, Polavaram irrigation project thawhna senso zawng zawng chu sorkar laipuiin a tum dawn a, mahse a enkawl zui hna chu state sorkar kutah a awm thung dawn niin a sawi. Hei bakah hian centrally-sponsored project thawhna leh, Vizag-Chennai leh Chennai-Bangalore industrial corridor siamna kawngah pawh a pui dawn bawk a ni. Ṭanpuina sumte hi a tahtawlin a pechhuak dawn a, kum 2019 inthlanpui neih hmain project tam zawk tan sum pekfel hman beisei a ni.

Sorkar laipui hian Andhra Pradesh state khawpui tur, Amaravati siamna leh cheina atan cheng vaibelchhe 450 a pechhuak tawh a, hei bakah hian district hnufual pasarihte enkawlna turin vaibelcheh 350 a pe tawh bawk. Mahse Chief Minister Chandrababu Naidu chuan sorkar laipui sum pek chu a tlem tham nia sawiin, an state chu special status pe turin a phut.