Special status pek loh vangin AP-ah bandh huaihawt dawn

Andhra Pradesh-in special status pe tura sorkar laipuia a dilna chu hnawlsak a nih avangin state chhung hmun hrang hrangah lungawi lohna lantir a ni a, vawiin hian state pumah bandh huaihawt a ni dawn.

Andhra Pradesh sorkar hian nikuma an state ṭhendarh a, Telangana state thar din a nih avangin a sum hmuhna tam tak a chan a, a sum hlohte phuhrukna atan hian special status pe turin sorkar laipuiah ngenna a thlen a ni. Mahse Union Finance Minister Arun Jaitley chuan Ningani khan Andhra Pradesh hi special status pe loin, chhawmdawlna ṭha tak pek a ni zawk dawn tih a puang a, AP tana special package an siamte a puang.

Eptu party lian ber, YSR Congress bakah Congress leh Left Party-te leh pawl hrang hrangte chuan an ngenna sorkar laipuiin a hnawl avangin vawiin hian state pumah nawrh huaihawt an tum. Ningani pawh khan khawpui hrang hrangah lungawi lohna lantirin rally huaihawt a lo ni tawh bawk.

Finance ministry chuan AP tana ṭanpuina a pek tur hi kimchangin puang lo mah se, sum lama a chhawmdawlna tur chu cheng vaibelchhe nuai 1.50 hu a ni tih a sawi.

YSR Congress chuan state sorkar chu demin, Chief Minister Chandrababu Naidu-an state assembly-a financial package chungchang a sawi tur pawh an remti lo. Left party pawh an president YS Jaganmohan Reddy-a hoin assembly rorel inkhawmah hian thawmhnaw duma inthuamin an kal. Jagan chuan CM Naidu-a chu ngaihdam theih a ni lo tih sawiin, CM a nihna aṭang bang nghal tur leh, an party chu NDA aṭanga inhnukdawk tura a phut thu a sawi. Special status pek duh loh chu ṭhalaite hmakhua tihchhiatna ang tluka a ngaih thu a sawi bawk.

State Congress president N Raghuveera Reddy pawhin BJP leh state-a rorellai, TDP chuan Andhra Pradesh mipuite chu thil tam tak tiama an tihhlawhtlin duh leh si loh avangin an bum a ni, a ti.

Andhra Pradesh hi a dil anga special status a nih chuan sorkar laipui aṭangin ṭanpuina tam zawk a dawng thei dawn a, excise leh custom duty, income tax leh corporate tax-ahte ngaihnathiamna pek a ni ang a, grant atana pek aṭanga state expenditure zinga 90% chu sorkar laipuiin tumsakin, a bak 10% chu state hnenah loan-a pek a ni bawk ang.

Hei bakah hian centre-in state infra^≠structure leh social sector project hrang hrangah sum tam takin a pui bawk ang.